ബെംഗളൂരു: തിരഞ്ഞെടുപ്പ് പെരുമാറ്റ ചട്ട ലംഘനം നടത്തിയതിനെ തുടർന്ന് പുലികേശിനഗർ കോൺഗ്രസ് എംഎൽഎ എ.സി. ശ്രീനിവാസയ്ക്കും അനുയായികൾക്കുമെതിരെ കേസെടുത്തു. എംഎൽഎ ഓഫീസിൽ അനധികൃതമായി യോഗം നടത്തി കുടിവെള്ളവുമായി ബന്ധപ്പെട്ട പദ്ധതികൾക്ക് അപേക്ഷ സ്വീകരിച്ചതിനെ തുടർന്നാണ് കേസ്.
സംഭവത്തിന്റെ ദൃശ്യങ്ങൾ പകർത്താൻ ശ്രമിച്ച തിരഞ്ഞെടുപ്പ് കമ്മിഷന്റെ കാമറാമാനെ എംഎൽഎയും കൂട്ടാളികളും കയ്യേറ്റം ചെയ്തു. കഴിഞ്ഞ ചൊവ്വാഴ്ച വൈകീട്ടായിരുന്നു സംഭവം. കുടിവെള്ളത്തിനായി അപേക്ഷ സ്വീകരിക്കാൻ എംഎൽഎ രഹസ്യ യോഗംചേരുകയും അപേക്ഷകൾ സ്വീകരിക്കുകയും ചെയ്യുന്നതിന്റെ ദൃശ്യങ്ങൾ പകർത്തുന്നതിനിടെ കാമറമാനെ ശ്രീനിവാസും സംഘവും കൈയേറ്റം ചെയ്യുകയായിരുന്നു.
ക്യാമറയിൽനിന്ന് ദൃശ്യങ്ങൾ മായ്ച്ചതിനുശേഷമാണ് കാമറമാനെയും ഒപ്പമുണ്ടായിരുന്നവരേയും പുറത്തുവിട്ടത്. എംഎൽഎയും സംഘവും നടത്തിയത് ഗുരുതര പെരുമാറ്റ ചട്ട ലംഘനമാണെന്ന് ചൂണ്ടിക്കാട്ടി തിരഞ്ഞെടുപ്പ് നിരീക്ഷണ സംഘത്തിലെ ഉദ്യോഗസ്ഥർ നൽകിയ പരാതിയെത്തുടർന്നാണ് പുലികേശി നഗർ പോലീസ് കേസെടുത്തത്.
The post തിരഞ്ഞെടുപ്പ് പെരുമാറ്റചട്ട ലംഘനം; എംഎൽഎ എ.സി. ശ്രീനിവാസക്കെതിരെ കേസ് appeared first on News Bengaluru.
Powered by WPeMatico
