ബെംഗളൂരു: നഗരത്തിന്റെ തെക്കുപടിഞ്ഞാറന് ഭാഗത്തെ രാമോഹള്ളി തടാകത്തില് സ്യൂട്ട്കേസിനുള്ളില് 61-കാരിയായ സ്ത്രീയുടെ മൃതദേഹം ഉപേക്ഷിച്ച നിലയില് കണ്ടെത്തിയ സംഭവത്തില് യുവാവ് അറസ്റ്റില്. ചല്ലഘട്ട സ്വദേശി ഗഗന് രാജെഗൗഡയെ (21) ആണ് കുമ്പല്ഗോഡ് പോലീസ് അറസ്റ്റ് ചെയ്തത്.
കെങ്കേരി സ്വദേശിനി ജയാമ്മ ബോറെഗൗഡ (61) കൊല്ലപ്പെട്ടത്. ഇവരുടെ അയല്വാസിയാണ് ഗഗന്. ജയാമ്മയെ കൊലപ്പെടുത്തി സ്വര്ണാഭരണങ്ങള് മോഷ്ടിച്ച ശേഷം മൃതദേഹം തടാകത്തില് ഉപേക്ഷിക്കുകയായിരുന്നു. ഓണ്ലൈന് വാതുവയ്പ്പിനു പണം കണ്ടെത്താനായിരുന്നു കൊലപാതകം.
ജൂലൈ 16 ന് ജയാമ്മയെ കാണാതായതായി മകന് പോലീസില് പരാതി നല്കിയിരുന്നു. ബന്ധുക്കളുടെയും സുഹൃത്തുക്കളുടെയും വീടുകളിലും സമീപ പ്രദേശങ്ങളിലും ജയാമ്മയെ അന്വേഷിച്ചെങ്കിലും കണ്ടെത്താനായില്ല. മൊബൈല് ഫോണും സ്വിച്ച് ഓഫ് ആയിരുന്നു. ഇതിനിടെ ചൊവ്വാഴ്ച രാവിലെ തടാകത്തില് വലിയ സ്യൂട്ട്കേസ് പൊങ്ങിക്കിടക്കുന്നത് കണ്ട നാട്ടുകാര് വിവരം അറിയിച്ചതിനെ തുടര്ന്ന് കുമ്പളഗോഡു പോലീസ് നടത്തിയ പരിശോധനയിലാണ് മൃതദേഹം അതിനകത്ത് കണ്ടെത്തിയത്.
മൃതദേഹത്തില് നിന്ന് മംഗല്യസൂത്രം, വിരലിലെ മോതിരം, കമ്മലുകള് എന്നിവ കാണാതായതായി പോലീസ് കണ്ടെത്തി. ഇത് ആഭരണങ്ങള്ക്കുവേണ്ടിയാണ് കൊല്ലപ്പെടുത്തിയതെന്ന സംശയം ബലപ്പെടുത്തി. കേസില് പോലീസ് പ്രത്യേക സംഘം രൂപീകരിച്ചു നടത്തിയ അന്വേഷണത്തിലാണ് പ്രതി വലയിലായത്.
സ്വര്ണ്ണാഭരണങ്ങള് കവര്ന്നെടുക്കുക എന്ന ഉദ്ദേശ്യത്തോടെയാണ് താന് ജയാമ്മയെ കൊലപ്പെടുത്തിയതെന്ന് പ്രതി സമ്മതിച്ചതായും പോലീസ് പറഞ്ഞു. കൊലപ്പെടുത്തിയ ശേഷം സ്വര്ണ്ണ മാലയും കമ്മലുകളും ഊരിമാറ്റി, മൃതദേഹം വീട്ടില് സൂക്ഷിച്ചിരുന്ന ഒരു ചുവന്ന സ്യൂട്ട്കേസിനുള്ളില് സൂക്ഷിച്ചു. പിന്നീട് സ്യൂട്ട്കേസ് ഇരുചക്രവാഹനത്തില് കയറ്റി തടാകത്തിലേക്ക് തള്ളിയാതായും പ്രതി മൊഴി നല്കിയതായി പോലീസ് പറഞ്ഞു.
SUMMARY: 61-year-old woman’s body found in suitcase; Neighbor arrested
