ന്യൂഡൽഹി: 77-ാം റിപബ്ലിക്ക് ദിനത്തിന്റെ ഭാഗമായി 70 സൈനികർക്ക് ധീരതയ്ക്കുള്ള അവാർഡുകൾ പ്രഖ്യാപിച്ചു. ഇതിൽ ആറ് പേർക്ക് മരണാനന്തര ബഹുമതിയായാണ് അവാർഡ് നൽകുന്നത്. ആക്സിയം 4 വിക്ഷേപണ ദൗത്യത്തിന്റെ ഭാഗമായി അന്താരാഷ്ട്ര ബഹിരാകാശ നിലയത്തിലെത്തിയ ആദ്യ ഇന്ത്യക്കാരനായ വ്യോമസേനാ ഗ്രൂപ്പ് ക്യാപ്റ്റൻ ശുഭാംശു ശുക്ല സമാധാനകാലത്തെ പരമോന്നത ധീരതാപുരസ്കാരമായ അശോകചക്രയ്ക്ക് അർഹനായി. 2025 ജൂൺ 25-ന് സ്പേസ്എക്സിന്റെ ഡ്രാഗൺ ബഹിരാകാശ പേടകം ‘ഗ്രേസ്’ വഴിയാണ് ശുഭാംശു ശുക്ല ബഹിരാകശത്തെത്തിയത്. 18 ദിവസമാണ് അദ്ദേഹം ബഹിരാകാശ നിലയത്തിൽ തങ്ങിയത്. മലയാളായ ഗഗൻയാൻ ഗ്രൂപ്പ് ക്യാപ്റ്റൻ പ്രശാന്ത് ബാലകൃഷ്ണനടക്കം മൂന്ന് പേർക്ക് കീർത്തിചക്രയും ലഭിച്ചു.
ഇതിനുപുറമേ 13 ശൗര്യചക്ര, ധീരതയ്ക്ക് 44 സേനാമെഡലും നാവികസേനയിലുള്ളവർക്ക് ആറ് മെഡലും വ്യോമസേനയിലുള്ളവർക്ക് രണ്ട് മെഡലും പ്രഖ്യാപിച്ചു. ലെഫ്. കമാണ്ടർമാരായ കെ ദിൽന, എ രൂപ (നാവികസേന), അസി. കമാണ്ടന്റ് വിപിൻ വിത്സൺ (ആഭ്യന്തരമന്ത്രാലയം) തുടങ്ങിയവർക്ക് ശൗര്യചക്ര പുരസ്കാരങ്ങൾ ലഭിച്ചു.
SUMMARY: Ashok Chakra for Shubhamshu Shukla; Kirti Chakra for Prashanth Balakrishnan
