വാഷിങ്ടൺ: അമേരിക്കൻ ഇടക്കാല തിരഞ്ഞെടുപ്പിന്റെ വോട്ടെണ്ണൽ രാവിലെ ആരംഭിക്കും. ഇന്ത്യൻ സമയം ഇന്നു പുലർച്ചെ 5.30നാണ് വോട്ടെടുപ്പ് അവസാനിക്കുക. തുടര്‍ന്ന് വോട്ടെണ്ണൽ ആരംഭിക്കും. യു.എസ് കോൺഗ്രസിന്റെ ഇരുസഭകളിലും ആധിപത്യം ഉറപ്പിക്കാൻ ഭരണകക്ഷിയായ റിപ്പബ്ലിക്കൻ പാർട്ടിയും പ്രതിപക്ഷമായ ഡെമോക്രാറ്റിക് പാർട്ടിയും തമ്മിൽ ശക്തമായ പോരാട്ടമാണ് നടക്കുന്നത്. തിരഞ്ഞെടുപ്പിൽ വ്യാപകമായ ക്രമക്കേടുകൾ നടക്കുന്നുവെന്ന ട്രംപിന്റെ തുടർച്ചയായ ആരോപണങ്ങൾക്കിടയിലും ഇതുവരെ കാര്യമായ പ്രശ്നങ്ങളില്ലാതെയാണ് വോട്ടെടുപ്പ് പുരോഗമിച്ചത്. ജനപ്രതിനിധി സഭയിലെ 435 സീറ്റുകളിലേക്കും സെനറ്റിലെ 35 സീറ്റുകളിലേക്കും 36 സംസ്ഥാനങ്ങളിലെ ഗവർണർ പദവികളിലേക്കുമാണ് വോട്ടെടുപ്പ് നടക്കുന്നത്.
ഭരണകക്ഷിയായ റിപ്പബ്ലിക്കൻ പാർട്ടിയെ അട്ടിമറിച്ച് ജനപ്രതിനിധി സഭ ഡെമോക്രാറ്റുകൾ പിടിച്ചെടുക്കാൻ സാധ്യതയുണ്ടെന്ന് സർവേകളും രാഷ്‌ട്രീയനിരീക്ഷകരും വിലയിരുത്തുമ്പോൾ, സെനറ്റിലെ ഭൂരിപക്ഷം സംബന്ധിച്ച് കടുത്ത അനിശ്ചിതത്വം നിലനിൽക്കുന്നു. രണ്ടാം ലോകമഹായുദ്ധത്തിനുശേഷം രണ്ടു തവണയൊഴികെയുള്ള ഇടക്കാല തെരഞ്ഞെടുപ്പുകളിൽ ഭരണകക്ഷിക്കു കോൺഗ്രസിൽ തിരിച്ചടി നേരിട്ടു.ഇറാനുമായുള്ള യുദ്ധ പശ്ചാത്തലത്തിലുണ്ടായ ആഗോള വിലക്കയറ്റം, കുടിയേറ്റം, ജീവിതച്ചെലവ്, ഗർഭച്ഛിദ്രാവകാശം എന്നിവയാണ് ഈ തിരഞ്ഞെടുപ്പിൽ വോട്ടർമാരെ സ്വാധീനിച്ച പ്രധാന ഘടകങ്ങൾ.
നിലവിൽ യു.എസ് കോൺഗ്രസിന്റെ ഇരുസഭകളിലും റിപ്പബ്ലിക്കൻ പാർട്ടിക്കാണ് ഭൂരിപക്ഷമുള്ളത്. എന്നാൽ ഈ തിരഞ്ഞെടുപ്പിൽ പ്രതിപക്ഷമായ ഡെമോക്രാറ്റുകൾ സഭ പിടിച്ചെടുത്താൽ, അത് ട്രംപിന്റെ വരുംവർഷങ്ങളിലെ നിയമനിർമ്മാണങ്ങളെയും ഭരണത്തെയും കാര്യമായി ബാധിക്കും. ഇത്തവണ തപാൽ വോട്ടുകളിലും എർലി വോട്ടിംഗിലും (Early Voting) വൻ ജനപങ്കാളിത്തമാണ് രേഖപ്പെടുത്തിയത്. 5.5 കോടിയിലധികം ആളുകൾ വോട്ടെടുപ്പ് ദിവസത്തിന് മുൻപ് തന്നെ സമ്മതിദാനാവകാശം വിനിയോഗിച്ചിരുന്നു.
SUMMARY: US Midterm Elections: Vote counting to begin in the morning
