കൊച്ചി: അശ്ലീല ചിത്രങ്ങളില് അഭിനയിച്ച് പണം സമ്പാദിച്ചെന്ന പരാതിയില് നടി ശ്വേതാ മേനോനെതിരെയുള്ള കേസ് റദ്ദാക്കി ഹൈക്കോടതി. കൊച്ചി സെന്ട്രല് പോലീസ് ആണ് നടിക്കെതിരെ കേസെടുത്തിരുന്നത്. പൊതുപ്രവര്ത്തകനായ മാര്ട്ടിന് മേനാച്ചേരിയുടെ പരാതിയിലായിരുന്നു കേസ്. ഐടി നിയമത്തിലെ അനാശാസ്യ പ്രവര്ത്തന നിരോധന നിയമപ്രകാരമായിരുന്നു കേസ്.
എറണാകുളം സിജെഎം കോടതിയിലെ നടപടികളും ഹൈക്കോടതി റദ്ദാക്കി. കേസ് എഴുതിത്തള്ളാത്തത് എന്തുകൊണ്ടാണെന്നും പോലീസിനോട് ഹൈക്കോടതി ചോദിച്ചു. പാലേരി മാണിക്യം, രതിനിര്വേദം, ശ്വേതാ മേനോന്റെ പ്രസവം ചിത്രീകരിച്ച കളിമണ്ണ്, ഗര്ഭനിരോധന ഉറയുടെ പരസ്യചിത്രം എന്നീ ചിത്രങ്ങളാണെന്ന് പരാതിക്കാരന് ചൂണ്ടിക്കാട്ടിയത്. ഈ ചിത്രങ്ങള് സമൂഹമാധ്യമങ്ങളിലും അശ്ലീല സൈറ്റുകളിലും പ്രചരിക്കുന്നുണ്ടെന്ന് പരാതിക്കാരന് പറഞ്ഞു.
അതേസമയം ശ്വേത മേനോനെതിരായ കുറ്റകൃത്യം നിലനില്ക്കില്ലെന്നും പരാതി മുഖവിലയ്ക്കെടുത്താലും കുറ്റകൃത്യം നിലനില്ക്കില്ലെന്നും കോടതി വ്യക്തമാക്കി. ശ്വേത മേനോന്റെ സല്പ്പേര് കളങ്കപ്പെടുത്താനും വ്യക്തി വിദ്വേഷം മുൻനിർത്തിയുമാണ് പരാതിയെന്ന് ഹൈക്കോടതി നിരീക്ഷിച്ചു. മലയാള സിനിമയിലെ അഭിനേതാക്കളുടെ സംഘടനയായ ‘അമ്മ’യുടെ തിരഞ്ഞെടുപ്പ് സമയത്തായിരുന്നു ശ്വേത മേനോനെതിരെ കേസെടുത്തത്.
മജിസ്ട്രേറ്റ് കോടതിയുടെ നിർദേശപ്രകാരമായിരുന്നു എഫ്ഐആർ രജിസ്റ്റർ ചെയ്തത്. കാമസൂത്ര പരസ്യം, പലേരി മാണിക്യം, രതിനിര്വേദം, കളിമണ്ണ് തുടങ്ങിയ സിനിമകള് എന്നിവയില് ശ്വേത മേനോൻ ‘ഇന്റിമേറ്റ്’ ആയി അഭിനയിച്ചിട്ടുണ്ടെന്നും അതിലെ ദൃശ്യങ്ങള് സമൂഹമാധ്യമങ്ങളിലും അശ്ലീല വെബ്സൈറ്റുകളിലുമൊക്കെ പ്രചരിക്കുന്നു എന്നിങ്ങനെയാണ് ആരോപണങ്ങള് ഉയർന്നത്.
SUMMARY: High Court quashes case against Shweta Menon, alleging that she earned money by acting in pornographic films
