ട്രംപിന്റെ വെടിനിർത്തൽ പ്രഖ്യാപനത്തിന്‌ പിന്നാലെ ഇറാനെ ആക്രമിച്ച് ഇസ്രയേൽ

തെഹ്‌റാൻ: ഇറാൻ-അമേരിക്ക യുദ്ധം അവസാനിപ്പിക്കാനുള്ള സമാധാന ചർച്ചകൾ പുരോഗമിക്കുന്നതിനിടയിൽ, ഇറാൻ തലസ്ഥാനമായ തെഹ്‌റാനിൽ ശക്തമായ വ്യോമാക്രമണം നടത്തി ഇസ്രയേൽ. നഗരത്തിന്റെ ഹൃദയഭാഗത്തുള്ള ഭരണകൂട കേന്ദ്രങ്ങളെ ലക്ഷ്യമിട്ടാണ് ഇസ്രയേൽ പ്രതിരോധ സേന ആക്രമണം നടത്തിയത്. ഇസ്രയേൽ സർക്കാരിന്റെ നിർദ്ദേശപ്രകാരം സൈനിക നീക്കങ്ങൾ തുടരുമെന്ന് ഇസ്രയേൽ ഡിഫൻസ് ഫോഴ്സ് (IDF) വ്യക്തമാക്കി.

യുദ്ധം അവസാനിപ്പിക്കാനുള്ള നയതന്ത്ര നീക്കങ്ങളെക്കുറിച്ച് അമേരിക്കൻ പ്രസിഡന്റ് ഡോണൾഡ് ട്രംപ് പ്രസ്താവന നടത്തി നിമിഷങ്ങൾക്കകമാണ് ഇസ്രയേലിന്റെ ഈ അപ്രതീക്ഷിത സൈനിക നീക്കം ഉണ്ടായത്. തെഹ്‌റാനിലെ വിവിധയിടങ്ങളിൽ വൻ സ്ഫോടനങ്ങൾ ഉണ്ടായതായും നിരവധി കെട്ടിടങ്ങൾ തകർന്നതായും ഇറാന്റെ ഔദ്യോഗിക വാർത്താ ഏജൻസിയായ ഫാർസ് റിപ്പോർട്ട് ചെയ്തു.

Israel Operation against Iran

Tel Aviv#Iran #Tehran #UnitedStates #Trump #Russia #Putin #Israel #Netanyahu pic.twitter.com/D2SmwiYLwY

— Jean Stürgoen (@asicjk) March 23, 2026

ആക്രമണത്തിൽ ഒരു പാർപ്പിട സമുച്ചയം തകരുകയും അവശിഷ്ടങ്ങൾക്കിടയിൽ കുടുങ്ങിയ കുട്ടിക്കായി തിരച്ചിൽ തുടരുകയാണെന്നും ഇറാനിയൻ റെഡ് ക്രസന്റ് സൊസൈറ്റി അറിയിച്ചു. സാധാരണക്കാർ താമസിക്കുന്ന മേഖലകളിൽ ഉൾപ്പെടെ വലിയ നാശനഷ്ടങ്ങൾ സംഭവിച്ചിട്ടുണ്ട്. അതേസമയം, അമേരിക്കയുമായി യാതൊരുവിധ ചർച്ചകളും നടന്നിട്ടില്ലെന്ന് ഇറാൻ വിദേശകാര്യ മന്ത്രാലയം വ്യക്തമാക്കി. സമാധാന ചർച്ചകളെക്കുറിച്ചുള്ള ട്രംപിന്റെ അവകാശവാദങ്ങൾ പൂർണ്ണമായും തള്ളിക്കളഞ്ഞ ഇറാൻ, അമേരിക്കയുമായി ആശയവിനിമയം നടത്തുന്നില്ലെന്ന് ആവർത്തിച്ചു.

ഇറാന്റെ ഊർജ്ജ-വൈദ്യുതി നിലയങ്ങൾ ലക്ഷ്യമിട്ടുള്ള ആക്രമണങ്ങൾ അഞ്ച് ദിവസത്തേക്ക് നിർത്തിവെക്കുമെന്ന് ട്രംപ് നേരത്തെ പ്രഖ്യാപിച്ചിരുന്നു. എന്നാൽ ഇസ്രയേലിന്റെ പുതിയ വ്യോമാക്രമണം ഈ സമാധാന ശ്രമങ്ങളെ അനിശ്ചിതത്വത്തിലാക്കിയിരിക്കുകയാണ്. നയതന്ത്ര നീക്കങ്ങൾക്കിടയിൽ നടക്കുന്ന ഇത്തരം സൈനിക നടപടികൾ പശ്ചിമേഷ്യയിലെ സ്ഥിതിഗതികൾ കൂടുതൽ സങ്കീർണ്ണമാക്കുമെന്നാണ് അന്താരാഷ്ട്ര നിരീക്ഷകർ വിലയിരുത്തുന്നത്.
SUMMARY: Israel attacks Iran after Trump’s ceasefire announcement