ബെംഗളൂരു: നഗരത്തിലെ 100-ലധികം പ്രദേശങ്ങളിൽ ഇന്ന് രാവിലെ 6 മണി മുതൽ രാത്രി 9 മണിവരെ കാവേരി കുടിവെള്ള വിതരണം തടസ്സപ്പെടുമെന്ന് ബെംഗളൂരു ജലവിതരണ-മലിനജല നിർമാർജന ബോർഡ് അറിയിച്ചു. കാവേരി അഞ്ചാംഘട്ട ജലവിതരണ പദ്ധതിയിലെ 3,000 മില്ലീമീറ്റർ വ്യാസമുള്ള പ്രധാന ട്രാൻസ്മിഷൻ പൈപ്പ് ലൈനിലെ സ്കവർ വാൽവിൽ ഉണ്ടായ ചോർച്ച അടിയന്തരമായി പരിഹരിക്കുന്നതിനായാണ് 15 മണിക്കൂർ ജലവിതരണം നിർത്തിവയ്ക്കുന്നത്.
അറ്റകുറ്റപ്പണി നടക്കുന്ന സമയത്ത് പമ്പിംഗ് സ്റ്റേഷനുകളും പ്രവർത്തിക്കില്ല.
ജലവിതരണ തടസ്സം നഗരത്തിന്റെ വടക്ക്, കിഴക്ക്, തെക്ക് ഭാഗങ്ങളിലെ നിരവധി പ്രദേശങ്ങളെ ബാധിക്കും. അനന്തപുര, ദൊഡ്ഢബെട്ടഹള്ളി, ചിക്കബെട്ടഹള്ളി, ഹരോഹള്ളി, കെഞ്ചനഹള്ളി, ഗോവിന്ദപുര, വാസുദേവപുര, മഞ്ചേനഹള്ളി, കട്ടിഗെനഹള്ളി, ശ്രീനിവാസപുര, ബെല്ലഹള്ളി, തിരുമേനഹള്ളി, ചൊക്കനഹള്ളി, തനിസന്ദ്ര, ചല്ലെകെരെ, ഹൊറമാവ് അഗ്ര, അമാനി, ബൈരതി ഖാനെ, ഗെദ്ദലഹള്ളി, കൊത്തനൂർ നാരായണപുര, കൊത്തനൂർ, നാഗേനഹള്ളി, കൈലാസനഹള്ളി, ബൈരതി, ബിലിശിവാലെ, ഹൊറമാവ്, കെ. ചന്നസന്ദ്ര, വരണാസി, ദാസറഹള്ളി, റാചേനഹള്ളി, ഗുഞ്ചൂർ, കടുബീസനഹള്ളി, ഉത്തരഹള്ളി, സുബ്രഹ്മണ്യപുര, വർതൂർ, പനത്തൂർ, കൽക്കെരെ, കലേന അഗ്രഹാര, ഹെമ്മിഗേപുര, ലിംഗധീരനഹള്ളി എന്നിവിടങ്ങളിലും സമീപ ലേഔട്ടുകളിലും ജലവിതരണം പൂർണമായോ ഭാഗികമായോ തടസ്സപ്പെടും. ആകെ 107-ലധികം പ്രദേശങ്ങളെയാണ് ഈ അറ്റകുറ്റപ്പണി ബാധിക്കുന്നത്.
അറ്റകുറ്റപ്പണികൾ പൂർത്തിയായ ശേഷം രാത്രി മുതൽ ജലവിതരണം ഘട്ടംഘട്ടമായി പുനഃസ്ഥാപിക്കുമെന്ന് ജല അതോറിറ്റിബോർഡ് അറിയിച്ചു. എന്നാൽ ഉയർന്ന പ്രദേശങ്ങളിലും വിതരണ ശൃംഖലയുടെ അവസാന ഭാഗങ്ങളിലുമുള്ള ഉപഭോക്താക്കൾക്ക് വെള്ളം സാധാരണ നിലയിൽ ലഭിക്കാൻ കൂടുതൽ സമയം എടുത്തേക്കാമെന്നും അധികൃതർ മുന്നറിയിപ്പ് നൽകി. ആശുപത്രികൾ, അപ്പാർട്ട്മെന്റുകൾ, ഹോട്ടലുകൾ, വ്യാപാര സ്ഥാപനങ്ങൾ, പൊതുജനങ്ങൾ എന്നിവർ ആവശ്യമായ കുടിവെള്ളം മുൻകൂട്ടി സംഭരിക്കുകയും ലഭ്യമായ വെള്ളം മിതമായി ഉപയോഗിക്കുകയും ചെയ്യണമെന്ന് ബോർഡ് അഭ്യർഥിച്ചിട്ടുണ്ട്.
SUMMARY: Drinking water supply to be disrupted for 15 hours in various areas of Bengaluru today
