ഹൊസൂര്‍: തമിഴ്‌നാട്ടില്‍ നടക്കുന്ന നിയമസഭാ തിരഞ്ഞെടുപ്പിൽ വോട്ട് ചെയ്യാനായി ബെംഗളൂരുവില്‍ നിന്നും നാട്ടിലേക്ക് മടങ്ങുകയായിരുന്ന സംഘം സഞ്ചരിച്ച കാർ അപകടത്തില്‍പ്പെട്ട് സഹോദരന്മാർ ഉൾപ്പെടെ മൂന്നുപേർ മരിച്ചു. കൃഷ്ണഗിരിയിലെ ഹൊസൂറിന് സമീപം ബുധനാഴ്ച പുലർച്ചെ നാല് മണിയോടെയായിരുന്നു അപകടം. കാറിലുണ്ടായിരുന്ന മറ്റൊരാൾക്ക് ഗുരുതരമായി പരുക്കേറ്റു.
ബെംഗളൂരുവിൽ താമസിക്കുന്ന സഹോദരന്മാരായ മാരി (28), പ്രദീപ് (25), വീരമണി (25) എന്നിവരാണ് മരിച്ചത്. ഇവര്‍ക്കൊപ്പമുണ്ടായിരുന്ന സതീഷ് കുമാറിനെ പരുക്കുകളോടെ ആശുപത്രിയില്‍ പ്രവേശിപ്പിച്ചു. ധർമ്മപുരി സ്വദേശികളാണ്‌ നാലുപേരും. പെന്നഗ്രാം താലൂക്കിലെ കടമഡൈ സ്വദേശിയായ സതീഷ് ബെംഗളൂരുവിൽ ഫാർമസിസ്റ്റായി ജോലി ചെയ്യുന്നു വീരമണി ഒരു ലഘുഭക്ഷണ കട നടത്തുന്നു, മാരിയും പ്രദീപും വീരമണിയുടെ കടയിലെ ജോലിക്കാരാണ്.
ബെംഗളൂരുവില്‍ നിന്ന് ചൊവ്വാഴ്ച രാത്രി വൈകിയാണ് സംഘം കാറില്‍ ധർമ്മപുരിയിലേക്ക് പുറപ്പെട്ടത്. യാത്രാമധ്യേ ബുധനാഴ്ച പുലര്‍ച്ചെ മൂന്നു മണിയോടെ ഹൊസൂർ-രായക്കോട്ടൈ റോഡിലെ സനമാവില്‍ വെച്ച് ഇവർ സഞ്ചരിച്ച കാർ സ്വകാര്യ ബസുമായി കൂട്ടിയിടിക്കുകയായിരുന്നു. കാറിലുണ്ടായിരുന്ന മൂന്ന് പേർ സംഭവസ്ഥലത്ത് വെച്ച് തന്നെ മരണപ്പെട്ടു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.
SUMMARY: Three people from Bengaluru die in car accident in Hosur while returning home to cast their votes in the morning
