ബെംഗളൂരു: നടിയും നര്‍ത്തകിയും ഉര്‍വശി അവാര്‍ഡ് ജേതാവുമായ അന്തരിച്ച മോനിഷയെ കുറിച്ച് അമ്മ ശ്രീദേവി ഉണ്ണി രചിച്ച് മാതൃഭൂമി ബുക്സ്‌ പുറത്തിറക്കിയ ഓര്‍മ്മകുറിപ്പുകള്‍ ‘എന്റെ മകൾ മോനിഷ’ യുടെ ബെംഗളൂരുവിലെ പ്രകാശനം ഇന്ദിരാനഗര്‍ ഇസിഎ ഓഡിറ്റോറിയത്തില്‍ നടന്നു. ഈസ്റ്റ് കൾച്ചറൽ അസോസിയേഷൻ സാഹിത്യവേദിയും ഗ്രന്ഥശാലയും സംയുക്തമായി സംഘടിപ്പിച്ച ചടങ്ങില്‍ പ്രശസ്ത സിനിമാതാരങ്ങളും നർത്തകികളുമായ മേതിൽ ദേവിക, ലക്ഷ്മി ഗോപാലസ്വാമി എന്നിവര്‍ ചേര്‍ന്ന് പുസ്തകം പ്രകാശനം ചെയ്തു.
ശ്രീദേവി ഉണ്ണി, സഞ്ജയ് അലക്സ്‌ വേണു രവീന്ദ്രന്‍, ജയരാജ് മേനോന്‍ എന്നിവര്‍ സംസാരിച്ചു. മോനിഷ അഭിനയിച്ച ചിത്രങ്ങളിലെ ഗാനങ്ങള്‍ ഉള്‍ക്കൊള്ളിച്ച സംഗീതപരിപാടിയും അരങ്ങേറി. പ്രശസ്ത ഗായകരായ രവിശങ്കർ, പ്രീത കെ.വി. എന്നിവർ ഗാനങ്ങള്‍ ആലപിച്ചു.
പ്രശസ്ത നർത്തകിയും നടിയും സാംസ്കാരിക പ്രവർത്തകയുമായ ശ്രീദേവി ഉണ്ണി രചിച്ച പുസ്തകത്തില്‍ അകാലത്തില്‍ വിടപറഞ്ഞ തന്റെ മകളെ കുറിച്ചുള്ള ഹൃദയസ്പർശിയായ ഓര്‍മ്മകളാണ് രേഖപ്പെടുത്തിയിരിക്കുന്നത്. മകളുടെ ഉന്നതിയിലുള്ള സന്തോഷം പങ്കുവെക്കുന്ന അമ്മയുടെ കഥകൂടിയാണ് ഈ പുസ്തകം.
