തിരുവനന്തപുരം: വി. മുരളീധരൻ ബി.ജെ.പി നിയമസഭ കക്ഷി നേതാവാകും. മാരാര്ജി ഭവനില് ചേര്ന്ന കോര് കമ്മിറ്റി യോഗത്തിലാണ് ധാരണയായത്. ദേശീയ നേതൃത്വത്തിന്റെ നിര്ദ്ദേശപ്രകാരമാണ് ഈ തീരുമാനം. സഭയില് പാര്ട്ടിയെ പ്രതിനിധീകരിക്കാന് ഏറ്റവും കൂടുതല് പിന്തുണ ലഭിച്ചതും മുരളീധരനാണ്.
നേരത്തെ രാജീവ് ചന്ദ്രശേഖറിന്റെ പേര് പാര്ലമെന്ററി പാര്ട്ടി നേതൃസ്ഥാനത്തേക്ക് പരിഗണിച്ചിരുന്നുവെങ്കിലും, നിലവില് അദ്ദേഹം സംസ്ഥാന അധ്യക്ഷനായതിനാല് ‘ഒരാള്ക്ക് ഒരു പദവി’ എന്ന നയം ഉയര്ത്തിക്കാട്ടിയാണ് വി. മുരളീധരനെ തിരഞ്ഞെടുത്തത്. 16ന് രാവിലെ 10 മണി മുതല് സംസ്ഥാന ഭാരവാഹി യോഗവും മാരാര്ജി ഭവനില് നടക്കും.
യോഗത്തില് ബിജെപി കോര് കമ്മിറ്റിയില് ശോഭാ സുരേന്ദ്രനും കെ സുരേന്ദ്രനുമെതിരെ വിമര്ശനമുയര്ന്നു. തിരഞ്ഞെടുപ്പ് അടുക്കുമ്പോള് മാത്രം മണ്ഡലം ശ്രദ്ധിച്ചാല് പോരെന്ന് രാജീവ് ചന്ദ്രശേഖര് വിലയിരുത്തി. മണ്ഡലം ശ്രദ്ധിച്ചവർ ജയിച്ചുവെന്നും കഴക്കൂട്ടവും ചാത്തന്നൂരും ഇതിന് ഉദാഹരണമാണെന്നും യോഗത്തിൽ വിലയിരുത്തി. സഭക്കെതിരായ പരാമര്ശത്തില് പിസി ജോര്ജിനും ഷോണിനുമെതിരെയും വിമര്ശനമുയര്ന്നു. പരാമര്ശം അനവസരത്തില് എന്ന് നേതാക്കള് വിലയിരുത്തി.
കഴിഞ്ഞ തിരഞ്ഞെടുപ്പിനേക്കാള് വോട്ട് വിഹിതം കൂടിയെന്നും യോഗത്തില് വിലയിരുത്തലുണ്ട്. സംഘടന ചുമതലയുള്ള ജനറല് സെക്രട്ടറി എസ്.സുരേഷിനെതിരെ രൂക്ഷവിമര്ശനം ഉയര്ന്നു. സംഘടന കാര്യങ്ങള് അറിയിക്കുന്നില്ല. സ്ഥാനാര്ഥി നിര്ണയം ഉള്പ്പടെ ഏകപക്ഷീയമായി നടത്തി. കെ.സുരേന്ദ്രനും വി.മുരളീധരനുമാണ് ഔദ്യോഗിക പക്ഷത്തിനെതിരെ വിമര്ശനമുന്നയിച്ചത്. പാലക്കാടും തൃശൂരും വോട്ടുചോര്ച്ച പരിശോധിക്കുമെന്നും വിലയിരുത്തലുണ്ട്.
SUMMARY: V. Muraleedharan elected as BJP legislature party leader
