തൃശൂര്: തൃശൂര് നെടുപുഴയിലെ കോള്പ്പാടത്ത് മിനി ബോട്ട് മുങ്ങി രണ്ടുപേരെ കാണാതായി. നെടുപുഴ മല്ലിത്തറ കടവില് നിന്ന് പാടത്ത് വളര്ത്തിയിരുന്ന മീനുകള്ക്ക് തീറ്റ നല്കാന് പോയ സംഘമാണ് അപകടത്തില്പ്പെട്ടത്. വെള്ളിയാഴ്ച രാത്രി എട്ടുമണിയോടെയായിരുന്നു സംഭവം. അഞ്ചുപേരാണ് ബോട്ടിലുണ്ടായിരുന്നത്. കോള്പ്പാടത്തിന്റെ നടുവിലെത്തിയപ്പോള് ബോട്ട് മുങ്ങുകയായിരുന്നു. ബോട്ടിലുണ്ടായിരുന്ന മൂന്നുപേര് നീന്തി കരയിലെത്തിയെങ്കിലും രണ്ടുപേരെ കാണാതായി.
വിവരമറിഞ്ഞെത്തിയ അഗ്നിരക്ഷാസേന രാത്രിയിലും തിരച്ചില് തുടരുകയാണ്. സ്ഥലത്ത് ശക്തമായ മഴയുണ്ട്. വെളിച്ചക്കുറവും പ്രതികൂലമായ കാലാവസ്ഥയും തിരച്ചിലിനെ ബാധിക്കുന്നുണ്ടെന്ന് ഉദ്യോഗസ്ഥർ പറയുന്നു. സുനി എന്ന വ്യക്തിയാണ് മീൻ വളർത്തലിനായി ഈ കോൾപാടം ലീസിനെടുത്തിരിക്കുന്നതാണ് പ്രാഥമിക വിവരം. അപകടത്തിന്റെ കാരണം സംബന്ധിച്ച് കൂടുതല് അന്വേഷണം തുടരുകയാണ്.
SUMMARY: Two people missing after mini boat sinks in Kolpadam, Thrissur
