കാസറഗോഡ്: കന്നുകാലിക്കടത്ത് ആരോപിച്ച് പിക്കപ്പ് വാൻ തടഞ്ഞ് ഡ്രൈവറെ ഭീഷണിപ്പെടുത്തി. കാസറഗോഡ് ജില്ലയിലെ മഞ്ചേശ്വരം ബായാറിലാണ് സംഭവം. പൈവള്ളികെ ആവളയില് ഇബ്രാഹിം ഖലീല് നല്കിയ പരാതിയില് രണ്ട് പേർക്കെതിരെ കേസെടുത്തു. പുനീത് എന്ന വ്യക്തിക്കെതിരെയും കണ്ടാലറിയുന്ന മറ്റൊരാള്ക്കെതിരെയുമാണ് കേസെടുത്തത്.
നാലു കാളകളാണ് പിക്കപ്പ് വാനില് ഉണ്ടായിരുന്നത്. രണ്ട് ബൈക്കുകളിലായി നാലംഗസംഘം പിക്കപ്പിനെ പിന്തുടർന്നതായി പരാതിയില് പറയുന്നു. ബൈക്കുകളിലൊന്ന് ഓവർടേക്ക് ചെയ്ത് പിക്കപ്പിന് മുന്നില് നിർത്തിയശേഷം അതിലുണ്ടായിരുന്ന രണ്ട് പേർ ഡ്രൈവറെ ഭീഷണിപ്പെടുത്തുകയായിരുന്നു.
ഇവർ അസഭ്യം പറഞ്ഞതായും വടികള് ഉപയോഗിച്ച് ആക്രമിക്കാൻ ശ്രമിച്ചതായും പരാതിക്കാരൻ പറയുന്നു. കന്നുകാലികളെ അറവുശാലകളിലേക്ക് കൊണ്ടുപോകാൻ അനുവദിക്കില്ലെന്നായിരുന്നു അക്രമികളുടെ ഭീഷണി. കാസറഗോഡ് ജില്ലയില് നേരത്തെയും സമാനമായ സംഭവം റിപ്പോർട്ട് ചെയ്തിട്ടുണ്ട്. സംഭവത്തില് വിശദമായ അന്വേഷണം ആരംഭിച്ചിരിക്കുകയാണ് പോലീസ്.
SUMMARY: Kasaragod: Vehicle stopped on suspicion of cow smuggling
