ബെംഗളൂരു: യാദ്ഗിർ ജില്ലയിലെ വഡഗേര ബസവനഗർ ഗ്രാമത്തിൽ ക്വാറിയിലെ വെള്ളക്കെട്ടില് വഴുതി വീണ് രണ്ട് പെൺകുട്ടികള് ഉൾപ്പെടെ മൂന്ന് പേർ മരിച്ചു. ഞായറാഴ്ച വൈകിട്ടാണ് ദാരുണമായ സംഭവം നടന്നത്. ഗുണ്ടമ്മ (35), സുജാത (9), ശിവലീല (10) എന്നിവരാണ് മരിച്ചത്. മൂവരും ഒരേ ഗ്രാമത്തിൽ നിന്നുള്ളവരാണ്.
ഗ്രാമത്തിൽ ജലലഭ്യത കുറവായതിനാല് ക്വാറിയില് വെച്ച് വസ്ത്രങ്ങൾ കഴുകാൻ പോയതായിരുന്നു പെണ്കുട്ടികള്. ക്വാറി സമീപം വസ്ത്രങ്ങൾ കഴുകുന്നതിനിടെ രണ്ട് പേരും കാൽ വഴുതി ആഴത്തിലുള്ള വെള്ളത്തിലേക്ക് വീണുവെന്നാണ് നിഗമനം. ഇവരെ രക്ഷിക്കാനായി വെള്ളത്തിലേക്ക് ചാടിയ ഗുണ്ടമ്മയും അപകടത്തില് പെടുകയായിരുന്നു. ക്വാറിയിൽ ആഴത്തില് വെള്ളമുണ്ടായിരുന്നതായും സുരക്ഷാ വേലിയോ മുന്നറിയിപ്പ് അടയാളങ്ങളോ ഇല്ലായിരുന്നുവെന്നുമാണ് പ്രാഥമിക വിവരം.
SUMMARY: Three people, including two girls, died after slipping and falling into a waterhole at a quarry
