ഇനി സഞ്ചരിച്ച ദൂരത്തിന് മാത്രം ടോൾ; ബെംഗളൂരു-മൈസൂരു എക്സ്പ്രസ് വേയിൽ ടോൾ പിരിവിൽ വൻമാറ്റം

ബെംഗളൂരു: ബെംഗളൂരു-മൈസൂരു എക്സ്പ്രസ് വേയിൽ മൾട്ടി-ലെയ്ൻ ഫ്രീ ഫ്ലോ (എംഎൽഎഫ്എഫ്) ടോളിങ് സംവിധാനം നടപ്പാക്കാനുള്ള പദ്ധതി ഉപേക്ഷിച്ച് ദേശീയപാത അതോറിറ്റി ഓഫ് ഇന്ത്യ (എൻഎച്ച്എഐ). പകരം വാഹനങ്ങൾ സഞ്ചരിക്കുന്ന ദൂരത്തിന് അനുസരിച്ച് ടോൾ ഈടാക്കുന്ന ക്ലോസ്ഡ് ടോളിങ് സംവിധാനം ആരംഭിക്കാനാണ് ദേശീയപാത അതോറിറ്റിയുടെ തീരുമാനം.

117 കിലോമീറ്റർ ദൈർഘ്യമുള്ള ബെംഗളൂരു-മൈസൂരു എക്സ്പ്രസ് വേയിൽ നിലവിൽ മുഴുവൻ പാതയ്ക്കും നിശ്ചിത ടോൾ നിരക്കാണ് ഈടാക്കുന്നത്. ദൂരാധിഷ്ഠിത ടോളിങ് സംവിധാനം നിലവിൽ വരുന്നതോടെ സഞ്ചരിച്ച ദൂരത്തിന് മാത്രം പണം നൽകിയാൽ മതിയാകും.

ഹൈവേയിലെ വിവിധ പ്രവേശന, പുറത്തുകടക്കൽ പോയിന്റുകൾ അടിസ്ഥാനമാക്കി വാഹനങ്ങൾ ഉപയോഗിക്കുന്ന ഭാഗത്തിന് മാത്രമായിരിക്കും ടോൾ ഈടാക്കുക. പ്രത്യേകിച്ച് കുറഞ്ഞ ദൂരം മാത്രം സഞ്ചരിക്കുന്നവർക്ക് പുതിയ സംവിധാനം ഗുണകരമാകുമെന്നാണ് എൻഎച്ച്എഐയുടെ വിലയിരുത്തൽ. ഹൈവേയുടെ ഒരു ഭാഗം മാത്രം ഉപയോഗിക്കുന്ന യാത്രക്കാർക്കും നിലവിൽ മുഴുവൻ ടോൾ നൽകേണ്ടിവരുന്ന സാഹചര്യം ഒഴിവാക്കുകയാണ് ലക്ഷ്യം. ഇത് നടപ്പക്കുന്നതിന്റെ ഭാഗമായി പാതയിൽ കൂടുതൽ ടോൾ ബൂത്തുകൾ സ്ഥാപിക്കും. നിലവിൽ ബിഡദിയിലെ കണമിണിക്കെ, ശേഷഗിരിഹള്ളി, ശ്രീരംഗപട്ടണയിലെ ഗണങ്കൂർ എന്നിവിടങ്ങളിലാണ് ടോൾ ബൂത്തുകളുള്ളത്. ബിഡദി, രാമനഗര, ചന്നപട്ടണ, മദ്ദൂർ, മണ്ഡ്യ, ശ്രീരംഗപട്ടണ ബൈപ്പാസുകളിലാണ് പുതിയ ടോൾ ബൂത്തുകൾ പരിഗണിക്കുന്നത്.

നിലവിലുള്ള എംഎൽഎഫ്എഫ് സംവിധാനത്തിൽ വാഹനങ്ങൾ ടോൾ പ്ലാസയിൽ നിർത്തുകയോ വേഗം കുറയ്ക്കുകയോ ചെയ്യാതെ സഞ്ചരിക്കുന്നതിനിടയിൽ തന്നെ ടോൾ തുക സ്വമേധയാ ഈടാക്കാൻ സാധിക്കും. ഫാസ്റ്റാഗുകളും വാഹന നമ്പർ പ്ലേറ്റുകളും സ്വമേധയാ തിരിച്ചറിഞ്ഞാണ് ടോൾ ഇടപാടുകൾ പൂർത്തിയാക്കുക. ടോൾ പ്ലാസകളിലെ ഗതാഗതക്കുരുക്ക് കുറയ്ക്കാനും യാത്രാസമയം ലാഭിക്കാനും ഇന്ധന ഉപഭോഗം കുറയ്ക്കാനും വാഹനങ്ങളിൽ നിന്നുള്ള മലിനീകരണം കുറയ്ക്കാനും ഈ സംവിധാനത്തിന് കഴിയും. ഇന്ത്യയിലെ ആദ്യ എംഎൽഎഫ്എഫ് ടോളിങ് സംവിധാനം നടപ്പാക്കിയത് 2025 ഓഗസ്റ്റിൽ ഗുജറാത്തിലെ ദേശീയപാത 48-ലുള്ള ചോര്യാസി ഫീ പ്ലാസയിലാണ്.

നിലവില്‍ ബെംഗളൂരു–മൈസൂരു എക്സ്പ്രസ് വേയിലാണ് ഉയർന്ന ടോൾ നിരക്ക് ഈടാക്കുന്നത്. പകുതി ദൂരം സഞ്ചരിക്കുന്നവരും ഉയർന്ന ടോൾ നൽകേണ്ടിവരുന്നത് സംബന്ധിച്ച യാത്രക്കാരില്‍ നിന്ന് വ്യാപകമായ പരാതികള്‍ ഉയര്‍ന്നിരുന്നു. ഇതോടെയാണ് സഞ്ചരിച്ച ദൂരത്തിന് മാത്രം പണം ഈടാക്കുന്ന സംവിധാനത്തിലേക്ക് മാറാന്‍ എൻഎച്ച്എഐ തീരുമാനിച്ചത്.
SUMMARY: Now toll will be charged only for the distance travelled; Major change in toll collection on Bengaluru-Mysore Expressway