കൊച്ചി: നടി മല്ലികാ സുകുമാരന് താരസംഘടനയായ ‘എഎംഎംഎ’യില് നിന്ന് രാജി വച്ചു. ഫേസ്ബുക്ക് പോസ്റ്റിലൂടെയാണ് അവര് ഇക്കാര്യം അറിയിച്ചത്. താന് എപ്പോഴും സത്യത്തിനൊപ്പവും ന്യായത്തിനൊപ്പവുമാണെന്ന് വ്യക്തമാക്കിയ താരം, ശ്വേത മേനോന് പിന്തുണ പ്രഖ്യാപിക്കുകയും ചെയ്തു. ‘സ്നേഹപൂര്വം പടിയിറങ്ങുന്നു… ‘അമ്മ’യില് നിന്നും… സത്യത്തിനൊപ്പം… ന്യായത്തിനൊപ്പം… ശ്വേതയ്ക്കൊപ്പം.’ എന്നാണ് മല്ലികാ സുകുമാരന് ഫേസ്ബുക്കില് കുറിച്ചത്.
കഴിഞ്ഞദിവസം നടന്ന ‘എഎംഎംഎ’ ജനറല് ബോഡി യോഗത്തില് വലിയ പൊട്ടിത്തെറിയാണുണ്ടായത്. തുടര്ന്ന് ശ്വേതാ മേനോന്റെ നേതൃത്വത്തിലുള്ള ഭരണസമിതി ഒന്നടങ്കം രാജിവച്ചിരുന്നു. പിന്നാലെ മല്ലികാ സുകുമാരന് മാധ്യമങ്ങളോട് സംസാരിക്കവെ ശ്വേതാ മേനോന് പിന്തുണ പ്രഖ്യാപിച്ചു. ശ്വേതയല്ല, മറിച്ച് ജനറല് സെക്രട്ടറിയും ട്രഷററുമാണ് രാജിവക്കേണ്ടിയിരുന്നത് എന്നാണ് മല്ലിക പറഞ്ഞത്.
ഭരണസമിതിയിലെ 17 പേരും രാജിവക്കുകയായിരുന്നു. കാലാവധി പൂര്ത്തിയാകാന് രണ്ട് വര്ഷം ബാക്കി നില്ക്കെയാണ് രാജി. ജോയിന്റ് സെക്രട്ടറിയായ അന്സിബ ഹസന് നേരത്തെ രാജിവെച്ചിരുന്നു. അവിശ്വാസം നേരിടാതെയാണ് മുഴുവന് അംഗങ്ങളും രാജിവെച്ചത്. അതേസമയം താരസംഘടനയായ ‘എഎംഎംഎ’ യുടെ അംഗത്വത്തില് നിന്നും നടി ലക്ഷ്മിപ്രിയയും രാജിവച്ചിരുന്നു. സംഘടനയുടെ വാട്സ്ആപ്പ് ഗ്രൂപ്പിലാണ് താരം തന്റെ രാജി അറിയിച്ചത്.
SUMMARY: Mallika Sukumaran resigns from ‘AMMA’
