കൊല്ലം: കൊല്ലം പാരിപ്പള്ളി മെഡിക്കല് കോളേജിലെ ഡോക്ടർക്ക് ഷിഗെല്ല. ആശുപത്രിയിലെ ഹൗസ് സര്ജനാണ് ഷിഗെല്ല സ്ഥിരീകരിച്ചത്. ഇതോടെ ആരോഗ്യ വകുപ്പ് പ്രതിരോധ പ്രവർത്തങ്ങള് ശക്തമാക്കിയിരിക്കുകയാണ്. ഡോക്ടർക്ക് ഷിഗെല്ല സ്ഥിരീകരിച്ച സാഹചര്യത്തില് ആരോഗ്യ പ്രവർത്തകരും മെഡിക്കല് വിദ്യാർഥികളുള്പ്പെടെ നിരീക്ഷണത്തിലാണെന്ന് ജില്ലാ ആരോഗ്യ വിഭാഗം അറിയിച്ചു.
ആശുപത്രിയില് ജാഗ്രതാ നിര്ദേശം നല്കിയിട്ടുണ്ട്. രോഗലക്ഷണങ്ങള് ഉള്ളവരെ പ്രത്യേക നിരീക്ഷണത്തില് മാറ്റി പാര്പ്പക്കുമെന്നും അധികൃതര് അറിയിച്ചു. ഷിഗെല്ല ബാക്ടീരിയ മൂലമാണ് ഷിഗല്ലോസിസ് എന്ന അണുബാധ കുടലിനുണ്ടാകുന്നത്. വയറിളക്കമാണ് പ്രധാന രോഗലക്ഷണം. ശരിയായ സമയത്ത് ചികിത്സ ലഭിച്ചില്ലെങ്കില് രോഗം ഗുരുതരമാകും.
രോഗപ്രതിരോധശേഷി കുറഞ്ഞവരിലും അഞ്ച് വയസ്സിന് താഴെയുള്ള കുട്ടികളിലും രോഗം ഗുരുതരമാകാം. മലിനജലത്തിലൂടെയും കേടായ ഭക്ഷണത്തിലൂടെയുമാണ് പ്രധാനമായും ഷിഗെല്ല രോഗം പടരുന്നത്. ആഹാരം പാകം ചെയ്യുന്നവരില് നിന്നും രോഗം പകരാന് സാധ്യതയുണ്ട്. സംസ്ഥാനത്ത് ഷിഗെല്ല കേസുകളുടെ എണ്ണം വർധിക്കുന്നത് ആശങ്കയ്ക്ക് വഴിവെച്ചിരുന്നു.
SUMMARY: Doctor at Paripally Medical College tests positive for Shigella; medical students, among others, under observation
