ബെംഗളൂരു: മൈസൂരു ബന്ദിപ്പുർ, നാഗർഹോളെ വന്യജീവി സങ്കേതങ്ങളിലെ വിനോദസഞ്ചാരികൾക്കുള്ള സഫാരി നിരക്കുകൾ കൂട്ടി. സെപ്റ്റംബർ 1 മുതൽ 50% വരെയാണ് വര്ധന നിലവില് വരുത്തുന്നത്. സഫാരി സമയവും ദൂരവും കൂട്ടിയതിന്റെ ആനുപാതികമായാണ് വർധന. സഫാരിയുടെ ദൈർഘ്യം ഒന്നര മണിക്കൂറിൽ നിന്ന് 3 മണിക്കൂറായും ദൂരപരിധി 20 കിലോമീറ്ററിൽ നിന്ന് 35 കിലോമീറ്ററായും ഉയർത്തി.
ബന്ദിപ്പുരിലും നാഗർഹോളെയിലും മുതിർന്നവർക്കുള്ള ബസ് സഫാരി ഫീസ് 650 രൂപയിൽനിന്ന് 1000 രൂപയായും കുട്ടികൾക്ക് 350 രൂപയിൽനിന്ന് 500 രൂപയായും വർധിപ്പിച്ചു. മുതിർന്നവർക്കുള്ള ജീപ്പ് സഫാരി നിരക്ക് 1000 രൂപ യിൽനിന്ന് 1500 രൂപയായും കുട്ടികളുടെ നിരക്ക് 500 രൂപയിൽനിന്ന് 750 രൂപയായും വർധിപ്പിച്ചു. വാഹന പാർക്കിങ്, ക്യാമറ ഫീസ് എന്നിവയും കൂട്ടി. അതേസമയം മൂന്ന് വയസ്സിന് താഴെയുള്ള കുട്ടികൾക്ക് പ്രവേശനം സൗജന്യമാണ്.
SUMMARY: Safari fares increased for Bandipur, Nagarhole; safari duration also increased
