ബെംഗളൂരു: ഇത്തവണത്തെ വരണ്ട വേനലും മഴയുടെ കുറവും മൂലം ബെംഗളൂരുവിൽ കാവേരി കുടിവെള്ള വിതരണത്തിനുള്ള ആവശ്യം കുത്തനെ ഉയർന്നു. നഗരത്തിലെ വിവിധ പ്രദേശങ്ങളിൽ ഭൂഗർഭജല ലഭ്യത കുറഞ്ഞതോടെ ബെംഗളൂരു ജലവിതരണ-മലിനജല നിർമാർജന ബോർഡിന്റെ ‘കാവേരി ഓൺ വീൽസ്’ ജലവിതരണ സേവനത്തിലേക്കാണ് കൂടുതൽ പേർ ആശ്രയിക്കുന്നത്.
‘കാവേരി ഓൺ വീൽസ്’ പദ്ധതിയിലൂടെ ജലക്ഷാമം അനുഭവപ്പെടുന്ന വീടുകൾക്കും അപ്പാർട്ട്മെന്റുകൾക്കും സ്ഥാപനങ്ങൾക്കും ടാങ്കർ വഴി കാവേരി കുടിവെള്ളം എത്തിച്ചുനൽകുകയാണ് ചെയ്യുന്നത്. ഈ വേനൽക്കാലത്ത് ആവശ്യക്കാരുടെ എണ്ണം ഗണ്യമായി വർധിച്ചതോടെ ടാങ്കർ ബുക്കിങ്ങുകളും സർവീസുകളും റെക്കോർഡ് നിലവാരത്തിലെത്തിയതായി അധികൃതർ അറിയിച്ചു.
മഴയുടെ കുറവ്, ഭൂഗർഭജലനിരപ്പ് താഴ്ന്നത്, നിരവധി കുഴൽക്കിണറുകൾ വറ്റിയത് എന്നിവയാണ് ആവശ്യക്കാർ വർധിക്കാൻ പ്രധാന കാരണങ്ങളായി വിലയിരുത്തുന്നത്. നഗരത്തിന്റെ അതിർത്തി പ്രദേശങ്ങളിലും പുതുതായി വികസിച്ച പാർപ്പിട മേഖലകളിലുമാണ് കുടിവെള്ള ക്ഷാമം കൂടുതൽ അനുഭവപ്പെടുന്നതെന്നും അധികൃതർ വ്യക്തമാക്കി.
വേനൽക്കാലം മുന്നിൽക്കണ്ട് ജലത്തിന്റെ പാഴ്വിനിയോഗം ഒഴിവാക്കണമെന്നും മഴവെള്ള സംഭരണം ഉൾപ്പെടെയുള്ള ജലസംരക്ഷണ മാർഗങ്ങൾ കൂടുതൽ പ്രോത്സാഹിപ്പിക്കണമെന്നും ജലവിതരണ ബോർഡ് പൊതുജനങ്ങളോട് അഭ്യർഥിച്ചു. നഗരത്തിന്റെ വർധിച്ചുവരുന്ന ജലാവശ്യങ്ങൾ നിറവേറ്റാൻ ദീർഘകാല പദ്ധതികൾക്കും സുസ്ഥിര ജലനിർവഹണത്തിനും കൂടുതൽ പ്രാധാന്യം നൽകേണ്ട സാഹചര്യമാണുള്ളതെന്നും അധികൃതർ അഭിപ്രായപ്പെട്ടു.
SUMMARY:Water shortage as rains recede; Record demand for ‘Caveri on Wheels’ service in Bengaluru
