ബെംഗളൂരു: മുഹറം ആചരണത്തിന്റെ ഭാഗമായി ഇന്ന് ബെംഗളൂരു നഗരത്തിൽ നടക്കുന്ന പരമ്പരാഗത ഘോഷയാത്രയെ തുടർന്ന് ഉച്ചയ്ക്ക് 1 മണി മുതൽ വൈകിട്ട് 5.30 വരെ വിവിധ പ്രധാന റോഡുകളിൽ ഗതാഗത നിയന്ത്രണവും വഴിതിരിച്ചുവിടലും ഏർപ്പെടുത്തിയതായി ബെംഗളൂരു ട്രാഫിക് പോലീസ് അറിയിച്ചു. നഗരമധ്യത്തിലും പഴയ നഗരമേഖലയിലും തിരക്ക് വർധിക്കാനിടയുള്ളതിനാൽ യാത്രക്കാർ മുൻകൂട്ടി ബദൽ മാർഗങ്ങൾ ഉപയോഗിക്കണമെന്ന് അധികൃതർ നിർദേശിച്ചു.
"ಸಂಚಾರ ಸಲಹೆ"/"Traffic advisory" pic.twitter.com/KrtsJj9vSm
— ಬೆಂಗಳೂರು ಸಂಚಾರ ಪೊಲೀಸ್ BengaluruTrafficPolice (@blrcitytraffic) August 3, 2026
ജോൺസൺ മാർക്കറ്റിൽ നിന്ന് ഹൊസൂർ ലഷ്കർ റോഡിലെ എൽജിൻ അപ്പാർട്ട്മെന്റിലേക്കാണ് ഘോഷയാത്ര നടക്കുക. ഈ സമയത്ത് ഘോഷയാത്ര കടന്നുപോകുന്ന റോഡുകളിൽ വാഹനഗതാഗതം ഘട്ടംഘട്ടമായി നിയന്ത്രിക്കും.
ബ്രിഗേഡ് റോഡിൽ നിന്ന് ഷൂലൈ സർക്കിൾ വഴി ഹൊസൂർ റോഡിലേക്ക് പോകുന്ന വാഹനങ്ങൾ പഴയ പോലീസ് സ്റ്റേഷൻ ജംഗ്ഷനിൽ നിന്ന് വുഡ് സ്ട്രീറ്റ് – ടേറ്റ് ലെയ്ൻ – റിച്ച്മണ്ട് റോഡ് – റിച്ച്മണ്ട് സർക്കിൾ – ശാന്തിനഗർ ജംഗ്ഷൻ – നഞ്ചപ്പ സർക്കിൾ വഴിയാകും തിരിച്ചുവിടുക. അവിടെ നിന്ന് ലാങ്ഫോർഡ് റോഡ് വഴി സി.എം.പി. ജംഗ്ഷനിലെത്തി വലത്തേക്ക് തിരിഞ്ഞ് ഹൊസൂർ റോഡിൽ പ്രവേശിക്കാം.
അഡുഗോഡി ഭാഗത്ത് നിന്ന് ഹൊസൂർ റോഡിലേക്ക് എത്തുന്ന വാഹനങ്ങൾ അനേപാല്യ ജംഗ്ഷനിൽ നിന്ന് സെമിത്തേരി ക്രോസ് റോഡ് – ബെർലി സ്ട്രീറ്റ് – ലാങ്ഫോർഡ് റോഡ് വഴി നഞ്ചപ്പ സർക്കിളിലെത്തി, തുടർന്ന് റിച്ച്മണ്ട് റോഡിലേക്കോ ശാന്തിനഗർ ജംഗ്ഷൻ വഴിയോ യാത്ര തുടരണമെന്ന് ട്രാഫിക് പോലീസ് അറിയിച്ചു.
അതേസമയം, ഹൊസൂർ റോഡിലൂടെ സഞ്ചരിക്കുന്ന ഹെവി ഗുഡ്സ് വാഹനങ്ങൾ അഡുഗോഡി ജംഗ്ഷൻ, മൈക്കോ ജംഗ്ഷൻ, എട്ടാം മെയിൻ, വിൽസൺ ഗാർഡൻ മെയിൻ റോഡ് വഴി സിദ്ധയ്യ റോഡിലേക്ക് തിരിച്ചുവിടും. ഘോഷയാത്ര അവസാനിക്കുന്നതുവരെ ഈ നിയന്ത്രണങ്ങൾ തുടരുമെന്നും, അടിയന്തര ആവശ്യങ്ങൾ ഇല്ലെങ്കിൽ ഈ സമയത്ത് നഗരമധ്യത്തിലേക്കുള്ള യാത്ര ഒഴിവാക്കുന്നതാണ് ഉചിതമെന്നും ട്രാഫിക് പോലീസ് വ്യക്തമാക്കി. യാത്രയ്ക്കു മുമ്പ് തത്സമയ ട്രാഫിക് അപ്ഡേറ്റുകൾ പരിശോധിക്കാനും പോലീസ് അഭ്യർഥിച്ചിട്ടുണ്ട്.
SUMMARY: Muharram procession; Traffic restrictions in Bengaluru
