ബെംഗളൂരു: ബെംഗളൂരുവിലെ പ്രമുഖ ഇടതുപക്ഷ കൂട്ടായ്മയായ കല ബാംഗ്ലൂരിന്റെ മൂന്നാമത് സമ്മേളനം സമാപിച്ചു. പീനിയയിലെ ഹോട്ടൽ നെസ്റ്റ് ഇൻ (എന്ടിടിഎഫ്)-ൽ നടന്ന പരിപാടിയില് കർണാടകയുടെ വിവിധ ഭാഗങ്ങളിൽനിന്നായി തിരഞ്ഞെടുക്കപ്പെട്ട 200 പ്രതിനിധികൾ സമ്മേളനത്തിൽ പങ്കെടുത്തു.
പ്രതിനിധി സമ്മേളനം മുതിർന്ന സിപിഐ(എം) നേതാവ് വി. ജെ. കെ. നായർ ഉദ്ഘാടനം ചെയ്തു. രാജ്യത്തെ സമകാലിക സാമൂഹിക-രാഷ്ട്രീയ സാഹചര്യങ്ങൾ വിശകലനംചെയ്ത സമ്മേളനം സംഘടനയുടെ പ്രവർത്തനങ്ങൾ വിലയിരുത്തുകയും പുതിയ പദ്ധതികളും സംഘടനാവിപുലീകരണവും സംബന്ധിച്ച പ്രമേയങ്ങൾ ചര്ച്ച ചെയ്ത് അംഗീകരിച്ചു
വൈകിട്ട് നടന്ന പൊതുസമ്മേളനം രാജ്യസഭാംഗം എ.എ. റഹിം ഉദ്ഘാടനം ചെയ്തു. മതനിരപേക്ഷത, ജനാധിപത്യം, സാമൂഹികനീതി എന്നീ മൂല്യങ്ങൾ ഉയർത്തിപ്പിടിച്ച് പ്രവാസി മലയാളികളുടെ അവകാശങ്ങൾക്കായുള്ള പോരാട്ടത്തിൽ കല ബാംഗ്ലൂർ കൂടുതൽ ശക്തമായ ഇടപെടലുകൾ നടത്തണമെന്ന് അദ്ദേഹം ആഹ്വാനം ചെയ്തു.
സമ്മേളനത്തിന്റെ ഭാഗമായി കല യൂത്ത് വിങ്ങിന്റെ അംഗത്വ കാമ്പയിൻ ഉദ്ഘാടനം ചെയ്തു. സമൂഹത്തിന്റെ വിവിധ മേഖലകളിൽ മികച്ച സംഭാവനകൾ നൽകിയ വ്യക്തികളെ ചടങ്ങിൽ ആദരിക്കുകയും ചെയ്തു.
ഭാരവാഹികളായി ബി. കൊച്ചുമോൻ (പ്രസി.), ഫിലിപ്പ് കെ. ജോർജ് (ജന. സെക്ര.), സീതാ രാജീഷ് (ഖജാ.), പി.എൻ.വിനീത്, ടി.രാജേഷ് (വൈ.പ്രസി.), സി. സുമേഷ്, എം.എം. തോമസ് (ജോ.സെക്ര.), പ്രജിത്ത് കുമാർ (ജോയിന്റ് ഖജാ.) എന്നിവരെയും 33 അംഗ കേന്ദ്ര കമ്മിറ്റിയെയും ആറു പ്രത്യേകക്ഷണിതാക്കളെയും സമ്മേളനം തിരഞ്ഞെടുത്തു.
