ദുബായ്: ദുബായിലെ കാർ ഷോറൂമില് ഗ്യാസ് സിലിണ്ടർ പൊട്ടിത്തെറിച്ചുണ്ടായ അപകടത്തില് മലയാളിയ്ക്ക് ദാരുണാന്ത്യം. കൊല്ലം കൊട്ടാരക്കര സ്വദേശി ഷിജിൻ പോളാണ്(27) മരിച്ചത്. അപകടത്തില് അഞ്ചുപേർക്ക് പരുക്കേറ്റു. ഇന്നലെ വൈകിട്ടോടെ ദുബായിലെ ഷെയ്ഖ് സായിദ് റോഡിലുള്ള കാർ ഷോറൂമിലായിരുന്നു സംഭവം.
അപകടവിവരം അറിഞ്ഞയുടൻ ദുബായ് സിവില് ഡിഫൻസ് സംഘം സ്ഥലത്തെത്തി രക്ഷാപ്രവർത്തനം ആരംഭിച്ചിരുന്നു. ഗുരുതരമായി പരുക്കേറ്റ ഷിജിനെ ആശുപത്രിയില് പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. എട്ടുമാസം മുമ്പാണ് ഷിജിൻ ദുബായിലെത്തിയതെന്നാണ് വിവരം.
അപകടത്തില് പരുക്കേറ്റവർക്ക് അടിയന്തര വൈദ്യസഹായം നല്കിയതിന് ശേഷം ആശുപത്രിയില് പ്രവേശിപ്പിച്ചതായി അധികൃതർ വ്യക്തമാക്കി. രാത്രിയോടെ രക്ഷാപ്രവർത്തനം പൂർണമായും അവസാനിച്ചെന്നും സ്ഥിതിഗതികള് നിയന്ത്രവിധേയമായെന്നും അധികൃതർ അറിയിച്ചു.
SUMMARY: Accident at Dubai car showroom due to gas cylinder explosion: Malayali dies
