ബെംഗളൂരു: നഗരത്തിലെ മെട്രോ ശൃംഖല തമിഴ്നാട് അതിർത്തിയിലേക്ക് ദീര്‍ഘിപ്പിക്കാനുള്ള നീക്കവുമായി ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (ബിഎംആർസിഎൽ) ബൊമ്മസാന്ദ്രയിൽ അവസാനിക്കുന്ന യെല്ലോ ലൈന്‍ അത്തിബെലെ വരെ നീട്ടാനുള്ള പദ്ധതിയുടെ സാധ്യതാ പഠനം ബിഎംആർസിഎൽ പൂര്‍ത്തിയാക്കി. വിശദമായ പദ്ധതി റിപ്പോർട്ട് (ഡിപിആർ) തയ്യാറാക്കുന്നതിനായി ബിഎംആർസിഎൽ ഉടന്‍ ടെൻഡറുകൾ ക്ഷണിക്കുമെന്നാണ് റിപ്പോര്‍ട്ടുകള്‍.
ബൊമ്മസാന്ദ്രയിൽ നിന്ന് അത്തിബെലെ വരെ ഏകദേശം 10.5 കിലോമീറ്റർ ദൂരം മെട്രോ പാത നീട്ടാനാണ് നിർദേശം. ഇതിന്റെ ഭാഗമായി പുതിയ 9 മെട്രോ സ്റ്റേഷനുകൾ ഉൾപ്പെടുന്ന വിശദമായ പദ്ധതി റിപ്പോർട്ട് തയ്യാറാക്കുന്നതിനുള്ള നടപടികളാണ് പുരോഗമിക്കുന്നത്.
ഹോസൂർ റോഡിലെ ഗതാഗതക്കുരുക്ക് കുറയ്ക്കുന്നതിലും വ്യവസായ മേഖലകളിലേക്കുള്ള യാത്ര കൂടുതൽ എളുപ്പമാക്കുന്നതിലും ഈ വിപുലീകരണം നിർണായകമാകുമെന്നാണ് വിലയിരുത്തൽ. ബൊമ്മസാന്ദ്ര, ഹെബ്ബഗോഡി, ഇലക്ട്രോണിക്സ് സിറ്റി, അത്തിബെലെ മേഖലകളിൽ ദിവസേന യാത്ര ചെയ്യുന്ന ആയിരക്കണക്കിന് ആളുകൾക്ക് പദ്ധതി പ്രയോജനപ്പെടും. ബൊമ്മസാന്ദ്രയ്ക്കും അത്തിബെലെക്കും ഇടയിൽ അതിവേഗം വളരുന്ന നിരവധി റെസിഡൻഷ്യൽ, വ്യാവസായിക, വാണിജ്യ മേഖലകൾക്ക് ഇത് ഏറെ ഉത്തേജനം നൽകും. നിലവിൽ യെല്ലോ ലൈന്‍ ആർ.വി. റോഡിൽ നിന്ന് ബൊമ്മസാന്ദ്ര വരെയാണ്. അത്തിബെലെ വരെ നീട്ടിയാൽ തമിഴ്നാട് അതിർത്തി പ്രദേശങ്ങളിൽ നിന്നുള്ള ജനങ്ങള്‍ക്ക് ബെംഗളൂരുവിലേക്ക് വേഗത്തില്‍ എത്തിച്ചേരാന്‍ സാധിക്കും.
പുതിയ പാതയിലെ ആദ്യ സ്റ്റേഷൻ നാരായണ ഇൻസ്റ്റിറ്റ്യൂട്ട് ഓഫ് കാർഡിയാക് സയൻസസിലാണ് നിർദ്ദേശിക്കപ്പെട്ടിരിക്കുന്നത്, ഇത് യെല്ലോ ലൈനിന്റെ നിലവിലുള്ള ടെർമിനൽ സ്റ്റേഷനായ ബൊമ്മസാന്ദ്രയിൽ നിന്ന് ഏകദേശം 1.5 കിലോമീറ്റർ തെക്കാണ്. അടുത്ത സ്റ്റേഷൻ ചന്ദപുര സർക്കിളിൽ ആയിരിക്കും – ഏകദേശം 1.8 കിലോമീറ്റർ അകലെ – തുടർന്ന് ഹാലെ, തിരുമഗൊണ്ടനഹള്ളി, ബാലഗരനഹള്ളി, അത്തിബെലെ ഇൻഡസ്ട്രിയൽ ഏരിയ, യാദവനഹള്ളി, അത്തിബെലെ, അത്തിബെലെ ടെർമിനൽ എന്നിവിടങ്ങളിലും സ്റ്റേഷനുകള്‍ ഉണ്ടാകും.
അത്തിബെലെ വരെ മെട്രോ നീട്ടുന്നതിനെക്കുറിച്ചുള്ള പുതിയ നീക്കത്തിനൊപ്പം തമിഴ്നാട്ടിലെ ഹോസൂരിലേക്ക് മെട്രോ നീട്ടണമെന്ന നിർദേശവും നേരത്തെ ഉയർന്നിട്ടുണ്ട്. ബൊമ്മസന്ദ്ര–ഹോസൂർ മെട്രോ പദ്ധതിയിൽ കർണാടകയിലും തമിഴ്നാട്ടിലുമായി ഏകദേശം 23 കിലോമീറ്റർ പാത നിർമിക്കുന്ന ആശയമാണ് പരിഗണിച്ചിരുന്നത്. പദ്ധതിയിൽ നിരവധി സ്റ്റേഷനുകളും ഡിപ്പോയും ഉൾപ്പെടുത്തുന്ന നിർദേശമുണ്ടായിരുന്നു.എന്നാൽ പുതിയ നീക്കത്തിന്റെ ഇപ്പോഴത്തെ പ്രധാന ലക്ഷ്യം ബെംഗളൂരുവിന്റെ ഭാഗത്ത് അത്തിബെലെ വരെ മെട്രോ എത്തിക്കുകയാണ്. പിന്നീട് ഹോസൂരിലേക്കുള്ള അന്തർസംസ്ഥാന മെട്രോ ബന്ധത്തിന്റെ കാര്യത്തിൽ കൂടുതൽ തീരുമാനങ്ങൾ ഉണ്ടാകുമെന്നാണ് പ്രതീക്ഷ.
SUMMARY: Bengaluru Metro to reach Tamil Nadu border; Yellow Line to be extended up to Attibele
