ഡല്‍ഹി: ബിജെപി ദേശീയ വക്താവ് സ്ഥാനത്ത് നിന്ന് രാജിവച്ച ഷെഹ്സാദ് പൂനവാല, വീണ്ടും പാർട്ടി നേതൃത്വത്തിന് രാജിക്കത്ത് കൈമാറി. പാർട്ടിയില്‍ നിന്നും സംഘടനാ ചുമതലകളില്‍ നിന്നും രാജിവെച്ചുള്ളതാണ് കത്ത്. വ്യക്തിപരമായ കാരണങ്ങള്‍ ചൂണ്ടിക്കാട്ടിയാണ് പൂനവാല പാർട്ടി നേതൃത്വത്തിന് രാജി സമർപ്പിച്ചത്.
ബിജെപി ദേശീയ അധ്യക്ഷൻ നിതിൻ നബിന് നേരിട്ട് സമർപ്പിച്ച രാജി പരസ്യപ്പെടുത്തിയ പൂനവാല, അത് ഉടൻ സ്വീകരിക്കണമെന്ന് ആവശ്യപ്പെടുകയും ചെയ്തു. രാജി സമർപ്പിച്ച വിവരം അദ്ദേഹം തന്റെ എക്സ് അക്കൗണ്ടിലൂടെയാണ് പങ്കുവെച്ചത്. ജൂലൈ 30ന് തന്നെ രാജി സമർപ്പിച്ചിരുന്നുവെന്നും എന്നാല്‍ ബിജെപി രാജി സ്വീകരിക്കാതെ തീരുമാനം പുനഃപരിശോധിക്കാൻ ആവശ്യപ്പെടുകയായിരുന്നുവെന്നും അദ്ദേഹം കത്തില്‍ വ്യക്തമാക്കുന്നു.
ചില വ്യക്തികളുടെ പേരെടുത്തു പറയാതെ പരോക്ഷമായ വിമർശനവും അദ്ദേഹം ഉന്നയിച്ചിട്ടുണ്ട്. “കഴിഞ്ഞ കുറച്ചു ദിവസങ്ങളായുള്ള ചിലരുടെ ഇടപെടലുകള്‍ താൻ എടുത്ത മുൻ തീരുമാനത്തില്‍ ഉറച്ചുനില്‍ക്കാൻ നിർബന്ധിതനാക്കി” എന്ന് അദ്ദേഹം വ്യക്തമാക്കി. ആദ്യഘട്ടത്തില്‍ തന്റെ രാജി പാർട്ടി സ്വീകരിക്കാതിരുന്നത് വളരെ വൈകാരികമായ അനുഭവമായിരുന്നുവെന്നും അദ്ദേഹം കൂട്ടിച്ചേർത്തു.
2017ല്‍ കോണ്‍ഗ്രസ് പാർട്ടിയിലെ അധ്യക്ഷ തിരഞ്ഞെടുപ്പ് പ്രക്രിയയില്‍ ക്രമക്കേട് ആരോപിച്ചാണ് ഷെഹ്സാദ് പൂനവാല കോണ്‍ഗ്രസ് വിട്ടത്. തുടർന്ന് ബി.ജെ.പിയില്‍ ചേർന്ന അദ്ദേഹം പിന്നീട് പാർട്ടിയുടെ ദേശീയ വക്താവായി. ടെലിവിഷൻ ചർച്ചകളില്‍ പാർട്ടിയുടെ പ്രധാന വക്താക്കളിലൊരാളായി ശ്രദ്ധ നേടുകയും ചെയ്തിരുന്നു.
SUMMARY: BJP national spokesperson Shehzad Poonawalla has resigned again
