ഡല്ഹി: ബില്ക്കിസ് ബാനു കൂട്ടബലാത്സംഗ-കൊലപാതക കേസിലെ രണ്ട് പ്രതികളുടെ ശിക്ഷ താല്ക്കാലികമായി മരവിപ്പിച്ച് സുപ്രീംകോടതി. പ്രതികളായ ബിപിൻചന്ദ് ജോഷി, പ്രദീപ് മോദിയ എന്നിവർക്ക് സുപ്രീംകോടതി ജാമ്യം അനുവദിച്ചു.ഇരുവരും 17 വർഷത്തിലേറെയായി ജയില് ശിക്ഷ അനുഭവിച്ചുവരികയാണെന്നും, ഇവരുടെ അപ്പീലുകളില് വസ്തുതാപരവും നിയമപരവുമായ വിഷയങ്ങള് വിശദമായി പരിശോധിക്കേണ്ടതുണ്ടെന്നും കോടതി നിരീക്ഷിച്ചു.
പ്രതികളില് ഒരാളായ ജോഷിക്ക് ഗുരുതരമായ ശാരീരിക വൈകല്യമുണ്ടെന്ന കാര്യവും ജാമ്യം അനുവദിക്കുമ്പോള് ബെഞ്ച് പരിഗണിച്ചു. ജസ്റ്റിസ് എം.എം. സുന്ദരേഷ്, ജസ്റ്റിസ് പ്രസന്ന ബി. വരാലെ എന്നിവരടങ്ങിയ ബെഞ്ചാണ് ഒക്ടോബർ 28ന് ഉത്തരവ് പുറപ്പെടുവിച്ചത്. തങ്ങളുടെ ശിക്ഷ ശരിവെച്ച 2017 മെയ് മാസത്തിലെ ബോംബെ ഹൈക്കോടതി വിധിക്കെതിരെ പ്രതികള് നല്കിയ അപ്പീലിലാണ് സുപ്രീംകോടതിയുടെ നടപടി. അഡീഷണല് സോളിസിറ്റർ ജനറല് രാജാ താക്കറെ ജാമ്യാപേക്ഷയെ ശക്തമായി എതിർത്തിരുന്നു.
എന്നാല് ദീർഘകാലത്തെ തടവുശിക്ഷയും അപ്പീലിലെ നിയമവശങ്ങളും പരിഗണിച്ച് വിചാരണക്കോടതിയുടെ വ്യവസ്ഥകള്ക്ക് വിധേയമായി ജാമ്യം അനുവദിക്കുകയായിരുന്നു. അപ്പീലുകളില് വിശദമായ വാദം പിന്നീട് നടക്കും. 2002ലെ ഗുജറാത്ത് കലാപത്തിനിടെ ബില്ക്കിസ് ബാനുവിനെ കൂട്ടബലാത്സംഗം ചെയ്യുകയും കുടുംബത്തിലെ ഏഴ് പേരെ കൊലപ്പെടുത്തുകയും ചെയ്ത കേസില് ജീവപര്യന്തം തടവിന് ശിക്ഷിക്കപ്പെട്ട 11 പ്രതികളില് ഉള്പ്പെട്ടവരാണ് ഇരുവരും.
ശിക്ഷാ ഇളവ് നല്കി ഇവരെ വിട്ടയച്ച ഗുജറാത്ത് സർക്കാരിന്റെ നടപടി 2024 ജനുവരിയില് സുപ്രീംകോടതി റദ്ദാക്കിയിരുന്നു. ശിക്ഷാ ഇളവ് നല്കാൻ ഗുജറാത്ത് സർക്കാരിന് അധികാരമില്ലെന്ന് വ്യക്തമാക്കിയ കോടതി, 11 പ്രതികളോടും രണ്ടാഴ്ചയ്ക്കുള്ളില് ജയിലില് കീഴടങ്ങാൻ ഉത്തരവിട്ടിരുന്നു. തുടർന്ന് ഇവർ ജയിലിലേക്ക് മടങ്ങി.
SUMMARY: Bilkis Bano case: Supreme Court grants bail to 2 convicts after 17 years of imprisonment















