ശ്രീനഗർ: ജമ്മു കശ്മീരിലെ കുല്ഗാം ജില്ലയില് സുരക്ഷാസേനയും ഭീകരരും തമ്മിലുണ്ടായ ഏറ്റുമുട്ടലില് ഒരു ഭീകരനെ വധിച്ചു. ഒളിച്ചിരിക്കുന്ന രണ്ടാമത്തെ ഭീകരനെ സൈന്യം വളഞ്ഞിരിക്കുകയാണെന്നും ഇയാളെ കീഴ്പ്പെടുത്താനുള്ള നീക്കങ്ങള് ഊർജിതമായി തുടരുകയാണെന്നും പോലീസ് തിങ്കളാഴ്ച അറിയിച്ചു. കഴിഞ്ഞ ആഴ്ച കുല്ഗാമില് മൂന്ന് സി.ആർ.പി.എഫ് ജവാന്മാർക്ക് പരിക്കേല്ക്കാനിടയായ ഭീകരാക്രമണത്തിന് പിന്നില് പ്രവർത്തിച്ചവരാണ് സൈന്യത്തിന്റെ വലയിലായിരിക്കുന്നത്.
പ്രദേശത്ത് ഭീകരർ ഒളിച്ചിരിക്കുന്നുണ്ടെന്ന രഹസ്യവിവരത്തിന്റെ അടിസ്ഥാനത്തില് സൈന്യവും ജമ്മു കശ്മീർ പോലീസിന്റെ പ്രത്യേക ഓപ്പറേഷൻ ഗ്രൂപ്പും (എസ്.ഒ.ജി) സംയുക്തമായി നടത്തിയ തിരച്ചിലിനിടെയാണ് ഏറ്റുമുട്ടല് ആരംഭിച്ചത്. കുല്ഗാമില് ഭീകരരുമായി ഏറ്റുമുട്ടല് ആരംഭിച്ചതായി കശ്മീർ സോണ് പോലീസ് എക്സിലൂടെ (ട്വിറ്റർ) സ്ഥിരീകരിച്ചു.
ലത്തീഫ് ഭട്ട്, ഉമർ എന്നീ ഭീകരരാണ് പ്രദേശത്ത് കുടുങ്ങിക്കിടക്കുന്നതെന്ന് സുരക്ഷാ ഉദ്യോഗസ്ഥർ തിരിച്ചറിഞ്ഞിട്ടുണ്ട്. ഏറ്റുമുട്ടല് നടന്ന സ്ഥലത്ത് ഒരു ഭീകരന്റെ മൃതദേഹം കണ്ടെത്തിയതായും രണ്ടാമത്തെ ഭീകരനെ വധിക്കാനുള്ള ഓപ്പറേഷൻ തുടരുകയാണെന്നും അധികൃതർ വ്യക്തമാക്കി. ഭീകരർ രക്ഷപ്പെടുന്നത് തടയാൻ സമീപത്തുള്ള സൈനിക യൂണിറ്റുകളെയും വിന്യസിച്ച് പ്രദേശം പൂർണ്ണമായും സുരക്ഷാസേനയുടെ വലയത്തിലാക്കിയിരിക്കുകയാണ്.
SUMMARY: Indian Army retaliates; kills terrorists behind Kulgam attack
















