തിരുവനന്തപുരം: തിരുവനന്തപുരം ജില്ലാ പഞ്ചായത്തിലെ കല്ലറ വാര്ഡ് ഉള്പ്പെടെ സംസ്ഥാനത്തെ 38തദ്ദേശ സ്വയംഭരണ വാര്ഡുകളില് സെപ്റ്റംബര് 28ന് ഉപതിരഞ്ഞെടുപ്പ് നടത്തുമെന്ന് സംസ്ഥാന തിരഞ്ഞെടുപ്പ് കമ്മീഷണര് എന്. ശേഷാദ്രിനാഥന് അറിയിച്ചു. വിജ്ഞാപനം സെപ്റ്റംബര് മൂന്നിന് പുറപ്പെടുവിക്കും. നാമ നിര്ദ്ദേശ പത്രിക സെപ്റ്റംബര് മൂന്നു മുതല് 10 വരെ സമര്പ്പിക്കാം. നാമനിര്ദ്ദേശപത്രികകളുടെ സൂക്ഷ്മപരിശോധന സെപ്റ്റംബര് 11 ന് നടത്തും.
സ്ഥാനാര്ത്ഥിത്വം പിന്വലിക്കാനുള്ള അവസാന തീയതി സെപ്റ്റംബര് 14 ആണ്. 28ന് രാവിലെ ഏഴു മുതല് വൈകിട്ട് ആറുമണിവരെയാണ് വോട്ടെടുപ്പ്. വോട്ടെണ്ണല് സെപ്റ്റംബര് 29ന് രാവിലെ 10 മണിക്ക് ആരംഭിക്കും. മാതൃകാ പെരുമാറ്റച്ചട്ടം ഇന്ന് (സെപ്റ്റംബര് 1) മുതല് പ്രാബല്യത്തില് വന്നു. ഉപതിരഞ്ഞെടുപ്പുള്ള ജില്ലാ, ബ്ലോക്ക് പഞ്ചായത്ത് നിയോജക മണ്ഡലങ്ങളില് ഉള്പ്പെട്ട ഗ്രാമപഞ്ചായത്തുകളിലെ മുഴുവന് വാര്ഡുകളിലും പെരുമാറ്റച്ചട്ടം ബാധകമാണ്.
എന്നാല് ഗ്രാമപഞ്ചായത്തുകളില് ആ പഞ്ചായത്ത് പ്രദേശം മുഴുവനും മുനിസിപ്പാലിറ്റുകളില് അതത് വാര്ഡുകളിലുമാണ് പെരുമാറ്റച്ചട്ടം ബാധകമാകുന്നത്. ആഗസ്റ്റ് 19ന് പ്രസിദ്ധീകരിച്ച പുതുക്കിയ വോട്ടര്പട്ടിക അടിസ്ഥാനമാക്കിയാണ് ഉപതിരഞ്ഞെടുപ്പ്. പട്ടിക അതത് തദ്ദേശസ്ഥാപനങ്ങളിലും വില്ലേജ്, താലൂക്ക് ഓഫീസുകളിലും സംസ്ഥാന തിരഞ്ഞെടുപ്പ് കമ്മീഷന്റെ വെബ്സൈറ്റിലും ലഭ്യമാണ്. തിരഞ്ഞെടുപ്പ് നടപടിക്രമങ്ങള് പൂര്ത്തിയാക്കാനുള്ള അവസാന തീയതി ഒക്ടോബര് ഒന്നാണ്.
തിരഞ്ഞെടുപ്പ് ചെലവ് സംബന്ധിച്ച കണക്ക് ഒക്ടോബര് 29 നകം സമര്പ്പിക്കണം. കൊല്ലം ആലപ്പുഴ ഒഴികെ 12 ജില്ലകളിലെ രണ്ട് കോര്പ്പറേഷന് വാര്ഡുകള് (എറണാകുളം, കോഴിക്കോട്) മൂന്ന് മുനിസിപ്പാലിറ്റി വാര്ഡുകള് (തൃശൂര്, പാലക്കാട്, കണ്ണൂര് ) മൂന്ന് ജില്ലാ പഞ്ചായത്ത് വാര്ഡുകള് (തിരുവനന്തപുരം, കോട്ടയം, പാലക്കാട് ) ഏഴ് ബ്ലോക്ക് പഞ്ചായത്ത് വാര്ഡുകള് ,23 ഗ്രാമപഞ്ചായത്ത് വാര്ഡുകള് എന്നിവയിലേക്കാണ് ഉപതിരഞ്ഞെടുപ്പ് നടത്തുന്നത്.
SUMMARY: By-elections announced for 38 local body wards in the state; polling on the 28th of this month
