ബെംഗളൂരു: ഓൾ ഇന്ത്യ കെഎംസിസി ബെംഗളൂരു സെൻട്രൽ കമ്മിറ്റിയും ശിഹാബ് തങ്ങൾ സെന്റർ ഫോർ ഹ്യുമാനിറ്റിയും സംഘടിപ്പിക്കുന്ന ഒമ്പതാമത് സമൂഹ വിവാഹം ഇന്ന്. വൈകിട്ട് 3നു ശിവാജിനഗർ ഖുദൂസ് സാഹിബ് ഈദ് ഗാഹ് ഗ്രൗണ്ടിലാണ് ചടങ്ങുകള്‍. 56 ജോടികളുടെ വിവാഹമാണ് ഇത്തവണ ഒരുക്കിയിരിക്കുന്നത്. ഇതിൽ മറ്റു സമുദായത്തിൽപെട്ട 3 ജോടികളുടെ വിവാഹം കഴിഞ്ഞ ദിവസം ആചാരപ്രകാരം നടത്തി.
പൊതുസമ്മേളനം മുസ്ലിം ലീഗ് കേരള അധ്യക്ഷൻ പാണക്കാട് സാദിഖലി ശിഹാബ് തങ്ങൾ ഉദ്ഘാടനം ചെയ്യും. കർണാടക മുഖ്യമന്ത്രി ഡി.കെ.ശിവകുമാർ മുഖ്യാതിഥിയായിരിക്കും. മന്ത്രിമാരായ പി.കെ.കുഞ്ഞാലിക്കുട്ടി, രാമലിംഗ റെഡ്ഡി, യു.ടി.ഖാദർ, സമീർ അഹമ്മദ് ഖാൻ, റിസ്‌വാൻ അർഷാദ്, എംഎൽഎമാരായ എൻ.എ.ഹാരിസ്, ഉദയ് ബി.ഗരുഡാചർ, അഡ്വ. വി.കെ.ഫൈസൽ ബാബു, പാണക്കാട് സയ്യിദ് അബാസലി ശിഹാബ് തങ്ങൾ, പാണക്കാട് മുനവറലി ശിഹാബ് തങ്ങൾ എന്നിവർ പങ്കെടുക്കും.
ശിഹാബ് തങ്ങൾ സെന്റർ ഫോർ ഹ്യുമാനിറ്റിയുടെ പ്രഥമ മാനവതവാദ അവാർഡ് മലബാർ മുസ്ലിം അസോസിയേഷൻ പ്രസിഡന്റ് ഡോ.എൻ.എ.മുഹമ്മദിനു സമ്മാനിക്കും. ദുരന്തനിവാരണ പരിശീലനം പൂർത്തിയാക്കിയ 50 അംഗ ആദ്യബാച്ചിന്റെ സമർപ്പണം, സാമൂഹിക സുരക്ഷ പദ്ധതിയിൽ അംഗങ്ങളായിരിക്കെ മരിച്ചവരുടെ കുടുംബാംഗങ്ങൾക്കുള്ള ആനുകൂല്യ വിതരണം, വിവിധ മേഖലകളിൽ കഴിവു തെളിയിച്ചവരെ ആദരിക്കൽ എന്നിവ ഉണ്ടായിരിക്കും.
SUMMARY: AIKMCC’s ninth mass marriage today
