ബെംഗളൂരു: നിയമലംഘനങ്ങൾ തിരുത്താതെ പ്രവർത്തനം തുടരുന്ന പേയിങ് ഗസ്റ്റ് താമസകേന്ദ്രങ്ങൾ അടച്ചുപൂട്ടാനും സീൽ ചെയ്യാനും ഗ്രേറ്റർ ബെംഗളൂരു അതോറിറ്റിക്ക് കർണാടക ഹൈക്കോടതി അനുമതി നൽകി. നേരത്തേ നൽകിയ നിർദേശങ്ങളും അടച്ചുപൂട്ടൽ നോട്ടീസുകളും അവഗണിച്ച് ചില സ്ഥാപനങ്ങൾ പ്രവർത്തനം തുടരുന്നതായി അതോറിറ്റി കോടതിയെ അറിയിച്ചതിനെത്തുടർന്നാണ് നടപടി.
പ്രിൻസസ് ലേഡീസ് പി.ജി. ഉൾപ്പെടെ നാല് സ്ഥാപനങ്ങൾ അതോറിറ്റി നൽകിയ നോട്ടീസുകളെ ചോദ്യം ചെയ്ത് സമർപ്പിച്ച ഹർജികൾ പരിഗണിക്കുകയായിരുന്നു ജസ്റ്റിസ് സൂരജ് ഗോവിന്ദരാജ് അധ്യക്ഷനായ ബെഞ്ച്. ബെംഗളൂരുവിൽ വിദ്യാർഥികൾക്കും ജോലിക്കാർക്കും പി.ജി. താമസകേന്ദ്രങ്ങൾ ആവശ്യമാണ്. എന്നാൽ അതിന്റെ പേരിൽ നിയമങ്ങളും സുരക്ഷാനിബന്ധനകളും ലംഘിക്കാൻ ഉടമകൾക്ക് അവകാശമില്ലെന്ന് കോടതി വ്യക്തമാക്കി.
ഗ്രേറ്റർ ബെംഗളൂരു അതോറിറ്റി നടത്തിയ പരിശോധനയിൽ നഗരത്തിലെ 5,480 പി.ജി. കേന്ദ്രങ്ങളിൽ 3,597 എണ്ണവും ആവശ്യമായ ലൈസൻസില്ലാതെയാണ് പ്രവർത്തിക്കുന്നതെന്ന് കണ്ടെത്തി. ഇത് പരിശോധിച്ച സ്ഥാപനങ്ങളുടെ 65 ശതമാനത്തിലധികമാണ്.
കിഴക്കൻ ബെംഗളൂരുവിലാണ് ഏറ്റവും കൂടുതൽ നിയമവിരുദ്ധ പി.ജി. കേന്ദ്രങ്ങൾ കണ്ടെത്തിയത്. ഈസ്റ്റ് സിറ്റി കോർപ്പറേഷൻ പരിധിയിൽ 2,103 കേന്ദ്രങ്ങളും സൗത്ത് സിറ്റി കോർപ്പറേഷൻ പരിധിയിൽ 621 കേന്ദ്രങ്ങളും ലൈസൻസില്ലാതെ പ്രവർത്തിക്കുന്നതായി റിപ്പോർട്ടുണ്ട്.
അനുമതിയില്ലാത്ത അധിക നിലകൾ നിർമിക്കൽ, ബേസ്മെന്റുകളിൽ അടുക്കളകൾ പ്രവർത്തിപ്പിക്കൽ, അംഗീകൃത കെട്ടിടപ്ലാനിൽനിന്നുള്ള വ്യതിയാനങ്ങൾ, അഗ്നിസുരക്ഷാ സംവിധാനങ്ങളുടെ അഭാവം തുടങ്ങിയവയാണ് പരിശോധനയിൽ കണ്ടെത്തിയ പ്രധാന ക്രമക്കേടുകൾ.
പി.ജി. കേന്ദ്രങ്ങളിൽ സി.സി.ടി.വി. ക്യാമറകൾ, അഗ്നിശമന ഉപകരണങ്ങൾ, ആവശ്യമായ സുരക്ഷാ സംവിധാനങ്ങൾ എന്നിവ ഉറപ്പാക്കണമെന്ന് കോടതി നിർദേശിച്ചു. ശുദ്ധമായ കുടിവെള്ളം, സുരക്ഷിതമായ ഭക്ഷണം, ശുചിത്വം, താമസക്കാരുടെ സ്വകാര്യതയും സുരക്ഷയും എന്നിവയ്ക്കും പ്രാധാന്യം നൽകണം.
കെട്ടിടത്തിന്റെ അംഗീകൃത ഉപയോഗം, താമസക്കാരുടെ എണ്ണം, അടിയന്തരമായി പുറത്തുകടക്കാനുള്ള വഴികൾ, വൈദ്യുതി-പാചകവാതക സുരക്ഷ എന്നിവയും പരിശോധിക്കണം. നിയമലംഘനങ്ങളുടെ സ്വഭാവമനുസരിച്ച് അടച്ചുപൂട്ടൽ, കെട്ടിടം സീൽ ചെയ്യൽ, നിയമവിരുദ്ധ നിർമാണങ്ങൾ പൊളിച്ചുനീക്കൽ തുടങ്ങിയ നടപടികൾ സ്വീകരിക്കാം.
പി.ജി. കേന്ദ്രങ്ങൾ അടച്ചുപൂട്ടുന്നത് ആയിരക്കണക്കിന് വിദ്യാർഥികളെയും ജീവനക്കാരെയും ബാധിക്കാനിടയുള്ളതിനാൽ നടപടി ക്രമബദ്ധമായി നടപ്പാക്കണമെന്ന് കോടതി നിരീക്ഷിച്ചു. നിയമലംഘനങ്ങൾ തിരുത്തി ആവശ്യമായ നിബന്ധനകൾ പാലിക്കുന്ന സ്ഥാപനങ്ങളിലെ താമസക്കാരെ ഒഴിപ്പിക്കേണ്ട സാഹചര്യം ഉണ്ടാകരുതെന്നും കോടതി നേരത്തേ വ്യക്തമാക്കിയിട്ടുണ്ട്.
നിയമലംഘനങ്ങൾ കണ്ടെത്തുന്നതും പരിശോധന നടത്തുന്നതും ലൈസൻസ് പരിശോധിക്കുന്നതും തുടർച്ചയായ പ്രക്രിയയായിരിക്കണം. സുരക്ഷാ വീഴ്ചകൾ കണ്ടെത്തിയിട്ടും നടപടി സ്വീകരിക്കാത്ത ബന്ധപ്പെട്ട ഉദ്യോഗസ്ഥർക്കും ഉത്തരവാദിത്വമുണ്ടാകുമെന്ന് കോടതി മുന്നറിയിപ്പ് നൽകി.
SUMMARY: Illegal PG centers can be shut down; High Court grants permission
