ബെംഗളൂരു: നഗരത്തിലെ കെ.ടി.പി.ഒ.യുടെ 48.35 ഏക്കർ സ്ഥലത്ത് പുതിയ വ്യാപാര–പ്രദർശന–സമ്മേളന കേന്ദ്രം വികസിപ്പിക്കാൻ കർണാടക സർക്കാർ പദ്ധതിയിടുന്നു. വൈറ്റ്ഫീൽഡിലെ കർണാടക ട്രേഡ് പ്രമോഷൻ ഓർഗനൈസേഷന്റെ സ്ഥലത്ത് ലോകോത്തര നിലവാരത്തിലുള്ള സൗകര്യങ്ങൾ ഒരുക്കുന്നതിനാണ് പദ്ധതി.
പദ്ധതിയുടെ ഭാഗമായി ഏകദേശം അഞ്ച് ഏക്കർ സ്ഥലത്ത് പ്രത്യേക വ്യാപാര, പ്രദർശന, സമ്മേളന കേന്ദ്രം നിർമിക്കാനാണ് ആലോചന. താഴത്തെ നിലയിലും ഒന്നാം നിലയിലുമായി 10,000 ചതുരശ്ര മീറ്റർ വീതം, ആകെ 20,000 ചതുരശ്ര മീറ്റർ വിസ്തീർണമുള്ള കെട്ടിടമാണ് പരിഗണിക്കുന്നത്. ഏകദേശം 500 കാറുകൾക്ക് പാർക്കിങ് സൗകര്യവും ഇവിടെ ഒരുക്കും.
വ്യാപാര പ്രദർശനങ്ങൾ, വ്യവസായ സമ്മേളനങ്ങൾ, ഉൽപ്പന്ന പ്രകാശന പരിപാടികൾ, ബിസിനസ് മീറ്റിങ്ങുകൾ, വലിയ സാംസ്കാരിക പരിപാടികൾ, സംഗീത പരിപാടികൾ എന്നിവ നടത്താൻ കഴിയുന്ന തരത്തിലായിരിക്കും കേന്ദ്രം രൂപകൽപ്പന ചെയ്യുക. ബെംഗളൂരുവിൽ അന്താരാഷ്ട്ര നിലവാരത്തിലുള്ള വലിയ പ്രദർശനങ്ങളും സമ്മേളനങ്ങളും സംഘടിപ്പിക്കുന്നതിനുള്ള അടിസ്ഥാന സൗകര്യം വർധിപ്പിക്കുകയാണ് പദ്ധതിയുടെ പ്രധാന ലക്ഷ്യം.
മുംബൈയിലെ ജിയോ വേൾഡ് കൺവെൻഷൻ സെന്റർ, ഡൽഹിയിലെ ഭാരത് മണ്ഡപം, യശോഭൂമി തുടങ്ങിയ പ്രധാന പ്രദർശന–സമ്മേളന കേന്ദ്രങ്ങളുടെ മാതൃകകൾ പഠിച്ച ശേഷമായിരിക്കും പുതിയ കേന്ദ്രത്തിന്റെ രൂപകൽപ്പന അന്തിമമാക്കുക. ഇതിനായി രൂപകൽപ്പനയിൽ ആവശ്യമായ മാറ്റങ്ങൾ വരുത്താൻ ബന്ധപ്പെട്ട സ്ഥാപനത്തിന് നിർദേശം നൽകിയിട്ടുണ്ട്.
നിലവിൽ കെ.ടി.പി.ഒ.യുടെ സ്ഥലത്ത് രണ്ട് പ്രധാന പ്രദർശന ഹാളുകളുണ്ട്. ഇതിൽ ഒന്ന് 2002-ൽ നിർമിച്ചതും മറ്റൊന്ന് 2024-ൽ നിർമിച്ചതുമാണ്. പഴയ പ്രദർശന ഹാൾ നിലനിർത്തണമോ അതോ പുനർവികസിപ്പിക്കണമോ എന്ന കാര്യവും സർക്കാർ പരിശോധിച്ചുവരികയാണ്.
കെ.ടി.പി.ഒ.യുടെ ആകെ ഭൂവിസ്തൃതി നേരത്തെ 50 ഏക്കറായിരുന്നു. ബെംഗളൂരു മെട്രോ റെയിൽ കോർപ്പറേഷന് 1.65 ഏക്കർ ഭൂമി നൽകിയതിനെത്തുടർന്നാണ് നിലവിൽ 48.35 ഏക്കർ ശേഷിക്കുന്നത്. ഇതിന് പുറമെ കുന്ദലഹള്ളി മെട്രോ സ്റ്റേഷനും പ്രധാന റോഡിനും സമീപമുള്ള ഏകദേശം 14 ഏക്കർ ഒഴിഞ്ഞ ഭൂമിയും സാമ്പത്തികമായി പ്രയോജനപ്പെടുത്താനുള്ള സാധ്യത സർക്കാർ പരിശോധിക്കുന്നുണ്ട്.
SUMMARY: New trade and exhibition center on a 48-acre site in Bengaluru.
