അമൃത്സർ: പഞ്ചാബിലെ സോഷ്യൽ മീഡിയ ഇൻഫ്ലുവൻസറും മേക്കപ്പ് ആർട്ടിസ്റ്റുമായ ‘മാഡ് സന്ധു’ എന്ന് അറിയപ്പെടുന്ന മധുസൂദൻ വെടിയേറ്റു കൊല്ലപ്പെട്ടു. ശനിയാഴ്ച വൈകിട്ട് ആറുമണിയോടെയാണ് സംഭവം. വെടിയേറ്റ നിലയിൽ രക്തത്തിൽ കുളിച്ച് റോഡിൽ കിടക്കുന്ന നിലയിലാണ് സന്ധുവിനെ കണ്ടെത്തിയത്. സംഭവവുമായി ബന്ധപ്പെട്ട കൂടുതൽ വിവരങ്ങൾ പുറത്തുവന്നിട്ടില്ല.
പഞ്ചാബിലെയും മുംബൈയിലെയും ചലച്ചിത്രമേഖലയിൽ സ്റ്റൈലിസ്റ്റായും അസിസ്റ്റന്റ് കോസ്റ്റ്യൂം ഡിസൈനറായും പ്രവർത്തിച്ചാണ് മാഡ് സന്ധു ഔദ്യോഗിക ജീവിതം ആരംഭിച്ചത്.
തുടർന്ന് സോഷ്യൽ മീഡിയയിലും സന്ധു സജീവമായി. ആഡംബര വസ്ത്രധാരണം, ജീവിതശൈലി, പോപ്പ് സംസ്കാരം തുടങ്ങിയ വിഷയങ്ങളിലുള്ള ഉള്ളടക്കങ്ങളും അഭിപ്രായങ്ങളും ഇൻസ്റ്റാഗ്രാം റീലുകളിലൂടെയും വൈറൽ വീഡിയോകളിലൂടെയും പങ്കുവെച്ചിരുന്നു. LGBTQ+ വിഭാഗത്തോടുള്ള സ്വീകാര്യതയെക്കുറിച്ചുള്ള തുറന്ന നിലപാടുകളും സോഷ്യൽ മീഡിയയിൽ സന്ധുവിനെ ശ്രദ്ധേയനാക്കിയിരുന്നു. വെടിവയ്പ്പിന് പിന്നിലെ കാരണം വ്യക്തമല്ല. സംഭവത്തിൽ പോലീസ് അന്വേഷണം ആരംഭിച്ചതായാണ് റിപ്പോർട്ട്.
SUMMARY: Social media influencer shot dead in Punjab; reports indicate an attack by unidentified individuals on a motorcycle.
