ന്യൂഡല്‍ഹി: നോർത്ത് വെസ്റ്റേൺ റെയിൽവേ (NWR) 2,008 അപ്രന്റീസ് തസ്തികകളിലേക്കുള്ള വിജ്ഞാപനം പുറത്തിറക്കി. യോഗ്യതയുള്ളവരും താൽപ്പര്യമുള്ളവരുമായ ഉദ്യോഗാർത്ഥികൾക്ക് 2026 ഒക്ടോബർ 7 മുതൽ rrcjaipur.in എന്ന ഔദ്യോഗിക വെബ്‌സൈറ്റ് വഴി ഓൺലൈനായി അപേക്ഷിക്കാം. അവസാന തീയതി നവംബർ ആറ്‌.
അജ്മീർ, ബിക്കാനീർ, ജയ്‌പുർ, ജോധ്പുർ ഡിവിഷണൽ റെയിൽവേ മാനേജർ ഓഫീസുകൾ, അജ്മീർ ബിടിസി കാര്യേജ്/ലോക്കോ വർക്ക്‌ഷോപ്പുകൾ, ബിക്കാനീർ, ജോധ്പുർ കാര്യേജ് വർക്ക്‌ഷോപ്പുകൾ എന്നിവിടങ്ങളിലാണ് നിയമനം. പത്താം ക്ലാസ്‌ അല്ലെങ്കിൽ തത്തുല്യ പരീക്ഷ കുറഞ്ഞത് 50 ശതമാനം മാർക്കോടെ പാസായവർക്കും ബന്ധപ്പെട്ട ട്രേഡുകളിൽ ഐടിഐ (NCVT/SCVT) സർട്ടിഫിക്കറ്റ് ഉള്ളവർക്കും അപേക്ഷിക്കാം.
പ്രായപരിധി: 15–24. നിയമാനുസൃത ഇളവ്‌ ലഭിക്കും. പത്താം ക്ലാസിലെയും ഐടിഐയിലെയും മാർക്കിന്റെ ശരാശരി കണക്കാക്കി തയ്യാറാക്കുന്ന മെറിറ്റ് ലിസ്റ്റിന്റെ അടിസ്ഥാനത്തിലാണ് തിരഞ്ഞെടുപ്പ്. ജനറൽ, ഒബിസി, ഇഡബ്ല്യുഎസ് വിഭാഗങ്ങൾക്ക് 100 രൂപയാണ് അപേക്ഷാഫീസ്. എസ്‌സി, എസ്‌ടി, ഭിന്നശേഷിക്കാർ, വനിതകൾ എന്നിവർക്ക് ഫീസില്ല.
SUMMARY: 2,008 Apprentice Vacancies in North Western Railway; Last Date is November 6
