ന്യൂഡല്‍ഹി: മുൻ ഇന്ത്യൻ ക്യാപ്റ്റൻ സൗരവ് ഗാംഗുലിയെ ഇന്ത്യൻ പ്രീമിയർ ലീഗ് ടീമായ ഡൽഹി ക്യാപിറ്റൽസിന്റെ പുതിയ മുഖ്യ പരിശീലകനായി ഔദ്യോഗികമായി നിയമിച്ചു. 2027 ഐപിഎൽ സീസണിന് മുന്നോടിയായാണ് പ്രഖ്യാപനം വന്നിരിക്കുന്നത്.
2019 മുതൽ ഡൽഹി ക്യാപിറ്റൽസ് ഫ്രാഞ്ചൈസിയില്‍ വിവിധ ചുമതലകളില്‍ പ്രവര്‍ത്തിച്ചതിന് ശേഷമാണ് ഗാംഗുലി ആദ്യമായി മുഖ്യ പരിശീലകന്‍റെ റോള്‍ ഏറ്റെടുക്കുന്നത്. കഴിഞ്ഞ രണ്ട് സീസണുകളിൽ ടീമിന്റെ പരിശീലകനായിരുന്ന ഹേമംഗ് ബദാനിയുടെ പകരക്കാരനായാണ് ഗാംഗുലി ചുമതലയേൽക്കുന്നത്. നേരത്തെ ടീമിന്റെ ഉപദേശകനായും പിന്നീട് മെൻ പുരുഷ-വനിതാ ടീമുകളുടെ ക്രിക്കറ്റ് ഡയറക്ടറായും ഗാംഗുലി പ്രവർത്തിച്ചിട്ടുണ്ട്.
ഗാംഗുലി ഒരു ഐപിഎൽ ടീമിന്റെ മുഖ്യ പരിശീലകനാകുന്നത് ഇതാദ്യമായാണ്. നേരത്തെ ദക്ഷിണാഫ്രിക്കൻ ടി20 ലീഗിൽ പ്രിട്ടോറിയ ക്യാപിറ്റൽസിന്റെ കോച്ചായി പ്രവർത്തിച്ച് ടീമിനെ ഫൈനലിൽ എത്തിച്ചിരുന്നു. ഡൽഹി ക്യാപിറ്റൽസിന് ഇതുവരെ ഒരു ഐപിഎൽ കിരീടം നേടാൻ സാധിച്ചിട്ടില്ല. അതിനാൽ ഗാംഗുലിയുടെ ശക്തമായ നേതൃത്വത്തിന് കീഴിൽ കന്നി കിരീടം ലക്ഷ്യമിട്ടാണ് ടീം ഒരുങ്ങുന്നത്.
ഗാംഗുലിക്ക് പുറമെ വൻ അഴിച്ചുപണിയാണ് ഡൽഹി ക്യാപിറ്റൽസ് കോച്ചിങ് നിരയിൽ വരുത്തുന്നത്. ബാറ്റിങ് കോച്ചായി മുൻ ഇന്ത്യൻ താരം യുവരാജ് സിങ്ങും, ബോളിങ് കോച്ചായി ലങ്കൻ ഇതിഹാസം ചാമിന്ദ വാസും, സ്പിൻ ബോളിങ് കോച്ചായി അമിത് മിശ്രയും ടീമിനൊപ്പം ചേരുമെന്നാണ് റിപ്പോര്‍ട്ടുകള്‍.
SUMMARY: Delhi Capitals appoints Sourav Ganguly as head coach.
