ന്യൂഡല്‍ഹി: മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്നും തലസ്ഥാനത്ത് പ്രക്ഷോഭം തീര്‍ക്കാന്‍ സിജെപി. രാവിലെ പത്ത് മണിക്ക് പ്രവര്‍ത്തകരോട് ജന്തര്‍മന്തറിൽ എത്താന്‍ വക്താവ് അജിങ്ക്യ ഷിന്‍ഡെ ആഹ്വാനം ചെയ്തിട്ടുണ്ട്. പ്രതിഷേധം കടുപ്പിക്കുമെന്ന് ഇടതുപാര്‍ട്ടികളും പ്രഖ്യാപിച്ചിട്ടുണ്ട്. എസ്എഫ്‌ഐ, ഐസ അടക്കമുളള വിദ്യാര്‍ഥി സംഘടനകള്‍ ഇന്നും തെരുവില്‍ ഇറങ്ങും. സിപിഐഎമ്മും പ്രതിഷേധങ്ങളില്‍ പങ്കെടുക്കും.
രാവിലെ 10 മണിക്ക് ഡൽഹി ജന്തർമന്തറിലേക്ക് വീണ്ടും മാർച്ച് നടത്തുമെന്ന് സി.ജെ.പി നേതാവ് അജിങ്ക്യ ഷിൻഡേ ആഹ്വാനം ചെയ്തിട്ടുണ്ട്. “ഗ്യാനേഷ് കുമാർ രാജിവെക്കാതെ ഞങ്ങൾ പിന്മാറില്ല, വീടുകളിലേക്ക് മടങ്ങുകയുമില്ല. കഴിഞ്ഞ തവണ നിങ്ങളുടെ അഹങ്കാരം തകർത്തതുപോലെ ഇത്തവണയും ഞങ്ങൾ അത് ചെയ്യും,” – അജിങ്ക്യ ഷിൻഡേ മുന്നറിയിപ്പ് നൽകി.
പ്രതിഷേധവുമായി ബന്ധപ്പെട്ട് ഇന്നലെ കസ്റ്റഡിയിലെടുത്ത സി.ജെ.പി നേതാക്കൾ ഒഴികെയുള്ള മറ്റെല്ലാവരെയും ഡൽഹി പോലിസ് വിട്ടയച്ചു. നേതാക്കളായ അഭിജിത്ത് ദീപ്കെ, അശുതോഷ് റാങ്ക, സൗരവ് ദാസ്, ധ്രുവ് റാഠി എന്നിവർ കസ്റ്റഡിയിൽ തുടരുകയാണ്. ഇവർക്കെതിരെ കർശന നിയമനടപടികളുമായി മുന്നോട്ടുപോകുമെന്ന് പോലിസ് വ്യക്തമാക്കിയിട്ടുണ്ട്.
അതേസമയം ഡൽഹിയിലെ പ്രതിഷേധങ്ങളുടെ പശ്ചാത്തലത്തിൽ ഏർപ്പെടുത്തിയ കടുത്ത ഗതാഗത നിയന്ത്രണങ്ങൾക്കും മുൻ മുഖ്യമന്ത്രിമാർ ഉൾപ്പടെയുള്ള നേതാക്കളുടെ കൂട്ട അറസ്റ്റിനുമെതിരായ ഹർജികൾ പരിഗണിക്കാൻ സുപ്രീംകോടതി ഇന്ന് പ്രത്യേക സിറ്റിംഗ് നടത്തും. വെള്ളിയാഴ്ചത്തെ സുപ്രീംകോടതി ഉത്തരവ് ലംഘിച്ച് മെട്രോ സ്റ്റേഷനുകൾ അടച്ചിട്ടതിനെതിരേയുള്ള കോടതിയലക്ഷ്യ ഹർജിയും, നേതാക്കളുടെ കരുതൽ തടങ്കലിനെ ചോദ്യം ചെയ്തുള്ള ഹർജിയുമാണ് കോടതി പരിഗണിക്കുന്നത്. ജസ്റ്റീസുമാരായ ജോയ്മല്യ ബാഗ്ചി, വി. മോഹന എന്നിവരടങ്ങുന്ന പ്രത്യേക ബെഞ്ചാണു ഹർജികൾ പരിഗണിക്കുന്നത്.
സുപ്രീംകോടതി ഉത്തരവ് ലംഘിച്ചു മെട്രോ സ്റ്റേഷനുകൾ അടച്ചിടുന്നത് തുടർന്നുവെന്നും ഇതു ജനജീവിതം സ്തംഭിപ്പിച്ചുവെന്നും ചൂണ്ടിക്കാട്ടി അഭിഭാഷകൻ ശൈലന്ദ്ര മണി ത്രിപാഠിയാണു കോടതിയലക്ഷ്യ ഹർജി നൽകിയത്. കേന്ദ്ര ആഭ്യന്തര സെക്രട്ടറി ഗോവിന്ദ് മോഹൻ, ഡൽഹി പൊലിസ് കമ്മിഷണർ അനുരാഗ് കുമാർ, ഡിഎംആർസി ചെയർപേഴ്സൺ ഡി. താറ എന്നിവർക്കെതിരേയാണു ഹർജി.
സിജെപി സമരത്തെ നേരിടാന്‍ അടച്ചിട്ടിരുന്ന ഡല്‍ഹി മെട്രോയുടെ എല്ലാ സ്റ്റേഷനുകളും വീണ്ടും തുറന്നു പ്രവര്‍ത്തിച്ചു. 45 സ്റ്റേഷനുകളിലാണ് പോലീസിന്റെ ആവശ്യപ്രകാരം അടച്ചിട്ടിരുന്നത്്. ശനിയാഴ്ച രാത്രി 10 വരെയാണ് നിയന്ത്രണങ്ങള്‍ ഉണ്ടായിരുന്നത്.
SUMMARY: CJP protest: Agitation to continue today; Delhi under police security
