ബെംഗളൂരു: കർണാടകയിലെ കോലാർ ജില്ലയിലെ വേമഗലിൽ 1,000 കോടി രൂപയുടെ പുതിയ പ്ലംബിങ് ഉൽപ്പന്നങ്ങളുടെ നിർമാണശാല സ്ഥാപിച്ചു. പോദ്ദാർ പ്ലംബിംഗ് സിസ്റ്റംസ് ഗ്രൂപ്പിന്റെ വ്യവസായ പദ്ധതിയിലൂടെ ഏകദേശം 3,000 തൊഴിലവസരങ്ങൾ സൃഷ്ടിക്കാനാണ് സർക്കാർ ലക്ഷ്യമിടുന്നതെന്ന് പ്ലാന്റ് ഉദ്ഘാടനം ചെയ്തുകൊണ്ട് വ്യവസായ മന്ത്രി എം ബി പാട്ടീൽ പറഞ്ഞു.
പുതിയ വ്യവസായശാലയുടെ പ്രവർത്തനം പ്രദേശത്തെ തൊഴിൽമേഖലയ്ക്കും അനുബന്ധ ചെറുകിട വ്യവസായങ്ങൾക്കും ഉണർവ് നൽകുമെന്നാണ് പ്രതീക്ഷ. നിർമാണം, ഗതാഗതം, സംഭരണം, വിതരണ ശൃംഖല തുടങ്ങിയ മേഖലകളിലും ഇതിലൂടെ തൊഴിലവസരങ്ങൾ വർധിക്കാനിടയുണ്ട്.
പദ്ധതിയുമായി ബന്ധപ്പെട്ട് സൃഷ്ടിക്കപ്പെടുന്ന തൊഴിലവസരങ്ങളിൽ 60 ശതമാനം തദ്ദേശീയർക്കായി മാറ്റിവയ്ക്കണമെന്ന ആവശ്യം വ്യവസായമന്ത്രി മുന്നോട്ടു വെച്ചു . പ്രദേശവാസികൾക്ക് തൊഴിൽ ലഭ്യമാക്കുന്നതിലൂടെ വ്യവസായവികസനത്തിന്റെ നേട്ടം പ്രാദേശിക സമൂഹത്തിലേക്കും എത്തിക്കുകയാണ് ലക്ഷ്യം.
ബെംഗളൂരുവിന് സമീപമുള്ള വ്യവസായമേഖലകളിലേക്കുള്ള നിക്ഷേപം വർധിക്കുന്ന സാഹചര്യത്തിൽ കോലാർ പോലുള്ള ജില്ലകളിൽ പുതിയ വ്യവസായശാലകൾ ആരംഭിക്കുന്നത് പ്രാദേശിക സാമ്പത്തിക വളർച്ചയ്ക്ക് സഹായകമാകുമെന്നാണ് വിലയിരുത്തൽ.
SUMMARY:3,000 job opportunities; industrial investment of ₹1,000 crore in Kolar
