ബെംഗളൂരു: കർണാടകയുടെ വിവിധ ഭാഗങ്ങളിൽ ശക്തമായ കാറ്റിനും ഇടിമിന്നലിനും സാധ്യതയുള്ളതായി കാലാവസ്ഥാ വകുപ്പ് മുന്നറിയിപ്പ് നൽകി. ദക്ഷിണ ഉൾനാടൻ കർണാടകയിൽ ഒക്ടോബർ 27, 28 തീയതികളിലും ഉത്തര ഉൾനാടൻ കർണാടകയിൽ ഒക്ടോബർ 28, 29 തീയതികളിലുമാണ് ജാഗ്രതാ നിർദേശം.
ബംഗാൾ ഉൾക്കടലിൽ രൂപംകൊള്ളുന്ന ചുഴലിക്കാറ്റ് കർണാടകയെ കാര്യമായി ബാധിക്കാനിടയില്ലെന്നാണ് കാലാവസ്ഥാ വകുപ്പിന്റെ വിലയിരുത്തൽ. എങ്കിലും സംസ്ഥാനത്തിന്റെ ചില ഭാഗങ്ങളിൽ ഒറ്റപ്പെട്ട മഴയ്ക്കും ശക്തമായ കാറ്റിനും സാധ്യതയുണ്ട്. കാലാവസ്ഥയിലെ മാറ്റങ്ങൾ നിരീക്ഷിക്കാനും ഔദ്യോഗിക മുന്നറിയിപ്പുകൾ പാലിക്കാനും ജനങ്ങളോട് നിർദേശിച്ചിട്ടുണ്ട്.
ബെംഗളൂരു നഗരത്തിൽ ഒക്ടോബർ 27, 28 തീയതികളിൽ ഭാഗികമായി മേഘാവൃതമായ കാലാവസ്ഥയായിരിക്കുമെന്നാണ് നിലവിലെ പ്രവചനം. ബെംഗളൂരു നഗരത്തിന് പ്രത്യേക മുന്നറിയിപ്പ് നൽകിയിട്ടില്ല.
ശക്തമായ കാറ്റ് വീശുന്ന സമയത്ത് മരങ്ങൾക്കു താഴെയും ദുർബലമായ പരസ്യബോർഡുകൾക്കു സമീപവും നിൽക്കുന്നത് ഒഴിവാക്കണം. ഇരുചക്രവാഹന യാത്രക്കാർ ജാഗ്രത പാലിക്കണം. ഇടിമിന്നലുള്ളപ്പോൾ തുറസ്സായ സ്ഥലങ്ങളിൽ നിൽക്കുന്നതും സുരക്ഷിതമല്ല.
SUMMARY: Strong winds likely in Karnataka; yellow alert issued for southern interior districts.
