വിശാഖപട്ടണം/ഭുവനേശ്വർ: ബംഗാൾ ഉൾക്കടലിൽ രൂപപ്പെട്ട ‘അർണബ്’ ചുഴലിക്കാറ്റ് അതിതീവ്ര ചുഴലിക്കാറ്റായി ശക്തിപ്രാപിച്ചതോടെ ആന്ധ്രപ്രദേശിലും ഒഡിഷയിലും ജാഗ്രത ശക്തമാക്കി. ഒക്ടോബർ 28-ന് രാവിലെ ബാപട്‌ലക്കും വിശാഖപട്ടണത്തിനുമിടയിൽ യാനം മേഖലയ്ക്ക് സമീപം ചുഴലിക്കാറ്റ് കരതൊടാൻ സാധ്യതയുണ്ടെന്നാണ് കാലാവസ്ഥാ വകുപ്പിന്റെ മുന്നറിയിപ്പ്.
കരതൊടുന്ന സമയത്ത് മണിക്കൂറിൽ 115 മുതൽ 125 കിലോമീറ്റർ വരെ വേഗത്തിൽ കാറ്റുവീശാനും കാറ്റിന്റെ വേഗം 140 കിലോമീറ്റർ വരെ ഉയരാനും സാധ്യതയുണ്ട്. തീരദേശ ജില്ലകളിൽ അതിശക്തമായ മഴയ്ക്കും ശക്തമായ കാറ്റിനും സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.
ഒഡിഷയിലെ ഗഞ്ചാം, ഗജപതി, റായഗഡ, മൽക്കാൻഗിരി, കോരാപുട്ട്, നബരംഗ്പുർ എന്നീ ആറു ജില്ലകളിൽ ഒക്ടോബർ 28, 29 തീയതികളിൽ സ്കൂളുകൾ, കോളേജുകൾ, അങ്കണവാടികൾ എന്നിവ അടച്ചിടാൻ സംസ്ഥാന സർക്കാർ തീരുമാനിച്ചു. ബാധിത പ്രദേശങ്ങളിൽ കടലിൽ മത്സ്യബന്ധനം നിരോധിക്കുകയും കുന്നുകൾ, വെള്ളച്ചാട്ടങ്ങൾ, അണക്കെട്ടുകൾ തുടങ്ങിയ വിനോദസഞ്ചാര കേന്ദ്രങ്ങളിലേക്കുള്ള പ്രവേശനത്തിന് നിയന്ത്രണം ഏർപ്പെടുത്തുകയും ചെയ്തു.
ആന്ധ്രപ്രദേശിലും ചുഴലിക്കാറ്റ് ബാധിക്കാൻ സാധ്യതയുള്ള പ്രദേശങ്ങളിൽ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചിട്ടുണ്ട്. താഴ്ന്ന പ്രദേശങ്ങളിൽനിന്ന് ആളുകളെ സുരക്ഷിത കേന്ദ്രങ്ങളിലേക്ക് മാറ്റുന്നതിനുള്ള നടപടികളും ആരംഭിച്ചു.
ആന്ധ്രപ്രദേശിൽ അപകടസാധ്യതയുള്ള പ്രദേശങ്ങളിൽ താമസിക്കുന്ന 4,711 ഗർഭിണികളെ ആരോഗ്യകേന്ദ്രങ്ങളിലേക്കും ആശുപത്രികളിലേക്കും മാറ്റുന്നതിനുള്ള ക്രമീകരണങ്ങൾ നടത്തിയതായി റിപ്പോർട്ടുകൾ വ്യക്തമാക്കുന്നു. ദേശീയ ദുരന്തനിവാരണ സേനയുടെയും സംസ്ഥാന ദുരന്തനിവാരണ സേനയുടെയും സംഘങ്ങളെ വിവിധ സ്ഥലങ്ങളിൽ വിന്യസിച്ചിട്ടുണ്ട്.
SUMMARY: Cyclone ‘Arnab’ heads towards the coast; alert issued in Odisha and Andhra, schools closed.
