ബീജിങ്: ചരിത്രത്തിലാദ്യമായി 19 സീറ്റുകളുള്ള ഇലക്‌ട്രിക് പാസഞ്ചർ വിമാനം അവതരിപ്പിച്ച്‌ ചൈന. മണിക്കൂറില്‍ 300 കിലോമീറ്റർ വേഗതയുള്ള ‘സിഇ-25എ’ (CE-25A) ഇലക്‌ട്രിക് വിമാനത്തിന്റെ ആദ്യ പരീക്ഷണപ്പറക്കല്‍ വിജയകരമായി പൂർത്തിയായി. 10 ടണ്‍ ഭാരമുള്ള ഈ വിമാനം ഷാൻഡോങ് പ്രവിശ്യയില്‍ നിന്ന് മൂന്ന് ക്രൂ അംഗങ്ങളുമായാണ് നവംബർ 14-ന് ആദ്യ പറക്കല്‍ നടത്തിയത്.
ആകെ 57 മിനിറ്റും 46 സെക്കൻഡും നീണ്ട പരീക്ഷണത്തിനിടെ വിമാനം 16 മിനിറ്റിലധികം ആകാശത്ത് ചെലവഴിക്കുകയും 60.4 കിലോമീറ്റർ ദൂരം വിജയകരമായി പിന്നിടുകയും ചെയ്തു. വിമാനത്തിന്റെ എല്ലാ സാങ്കേതിക സംവിധാനങ്ങളും യാതൊരു തകരാറുകളുമില്ലാതെ സാധാരണ നിലയില്‍ പ്രവർത്തിച്ചതായി എൻജിനീയർമാർ വ്യക്തമാക്കി. സർക്കാർ ഉടമസ്ഥതയിലുള്ള കൊമേഴ്‌സ്യല്‍ എയർക്രാഫ്റ്റ് കോർപ്പറേഷൻ ഓഫ് ചൈനയാണ് (COMAC) ഈ വിമാനം വികസിപ്പിച്ചെടുത്തത്.
ഒറ്റച്ചാർജില്‍ 400 കിലോമീറ്റർ വരെ ദൂരം യാത്രക്കാരെ വഹിക്കാൻ ശേഷിയുള്ള ഈ വിമാനത്തിന് പരമാവധി 2,400 മീറ്റർ ഉയരത്തില്‍ പറക്കാനാകും. ഡിസ്ട്രിബ്യൂട്ടഡ് ഇലക്‌ട്രിക് ഡക്റ്റഡ്-ഫാൻ പ്രൊപ്പല്‍ഷൻ സിസ്റ്റത്തിലാണ് വിമാനം പ്രവർത്തിക്കുന്നത്. വിമാനത്തിന്റെ ചിറകുകളില്‍ ഘടിപ്പിച്ചിരിക്കുന്ന ഇലക്‌ട്രിക് ഫാനുകള്‍ ബാറ്ററി സിസ്റ്റത്തില്‍ നിന്ന് ഊർജം സ്വീകരിച്ചാണ് വിമാനത്തിന് മുന്നോട്ടുനീങ്ങാനുള്ള ത്രസ്റ്റ് നല്‍കുന്നത്.
ഫോസില്‍ ഫ്യുവലുകളെ ആശ്രയിക്കുന്ന ജെറ്റ് എൻജിനുകള്‍ക്കും ടർബോപ്രോപ്പ് എൻജിനുകള്‍ക്കും പകരമായാണ് ഈ പരിസ്ഥിതി സൗഹൃദ ഇലക്‌ട്രിക് വിമാനം രൂപകല്‍പ്പന ചെയ്തിരിക്കുന്നത്. പരീക്ഷണ പറക്കല്‍ വിജയകരമായതോടെ വാണിജ്യാടിസ്ഥാനത്തില്‍ ഇലക്‌ട്രിക് യാത്രാ വിമാനങ്ങള്‍ നിർമ്മിക്കാനുള്ള തയ്യാറെടുപ്പിലാണ് ചൈന.
SUMMARY: China develops electric passenger aircraft; maiden flight successful
