ബെംഗളൂരു: വ്യാജ കറൻസി നോട്ടുകളുമായി അഞ്ച് പേർ പിടിയിൽ. അഗ്രഹാര ദാസറഹള്ളി സ്വദേശികളായ കിഷോർ (44), ചന്ദ്രശേഖർ (48), തീർത്ഥ ഋഷി (28), ബസവനഗുഡി സ്വദേശി സുധീർ (49), വിജയനഗർ സ്വദേശി വിനയ് (42) എന്നിവരെയാണ് സെൻട്രൽ ക്രൈംബ്രാഞ്ച് (സിസിബി) അറസ്റ്റ് ചെയ്തത്. ഇവരിൽ നിന്ന് 23.4 ലക്ഷം രൂപയും 30.9 കോടിയുടെ വ്യാജ കറൻസി നോട്ടുകളീം പിടിച്ചെടുത്തതായി സിസിബി പോലീസ് അറിയിച്ചു.
നഗരത്തിലെ ചാരിറ്റബിൾ ട്രസ്റ്റുകളായിരുന്നു പ്രതികളുടെ ലക്ഷ്യം വെച്ചിരുന്നത്. കമ്മീഷൻ വ്യവസ്ഥയ്ക്ക് പകരമായി കോർപ്പറേറ്റ് സോഷ്യൽ റെസ്‌പോൺസിബിലിറ്റി (സിഎസ്ആർ) ഫണ്ട് നൽകാമെന്ന് വാഗ്ദാനം ചെയ്തായിരുന്നു ഇവർ തട്ടിപ്പ് നടത്തിയത്. കിഷോർ ആണ് മുഖ്യസൂത്രധാരൻ.
സുധീറും ചന്ദ്രശേഖറും ചാരിറ്റബിൾ സംഘടനകൾ സമീപിച്ച് സിഎസ്ആർ ഫണ്ടുകൾ വാഗ്ദാനം ചെയ്യും. ഫണ്ട് ലഭിക്കുന്നുണ്ടെന്ന് ഉറപ്പാക്കാൻ 40 ശതമാനം കമ്മീഷനും ഇവർ ആവശ്യപ്പെടും. പിന്നീട് കമ്മീഷൻ തുക ലഭിച്ച ശേഷം കടന്നുകളയുന്നതാണ് ഇവരുടെ രീതി. നഗരത്തിലെ ചില ചാരിറ്റബിൾ സംഘടനകൾക്ക് പ്രതികൾ വ്യാജനോട്ടുകൾ കൈമാറിയതായി അന്വേഷണത്തിൽ കണ്ടെത്തിയിട്ടുണ്ടെന്ന് പോലീസ് പറഞ്ഞു.
പ്രതികളിൽ നിന്ന് പിടിച്ചെടുത്ത നോട്ടുകൾ മുംബൈയിൽ അച്ചടിച്ചവയാണ്. സംഭവത്തിൽ വിശദ അന്വേഷണം പുരോഗമിക്കുകയാണെന്ന് സിസിബി ഉദ്യോഗസ്ഥർ പറഞ്ഞു.
The post മുപ്പത് കോടി രൂപയുടെ വ്യാജ കറൻസി നോട്ടുകളുമായി അഞ്ച് പേർ പിടിയിൽ appeared first on News Bengaluru.
Powered by WPeMatico
