ബെംഗളൂരു: സംസ്ഥാനത്തെ കാമ്പസുകളിൽ വിദ്യാർഥി രാഷ്ട്രീയവും തിരഞ്ഞെടുപ്പും തിരിച്ചുകൊണ്ടുവരുന്നതിനുള്ള സാധ്യത പരിശോധിക്കാൻ കർണാടക കോൺഗ്രസ് പ്രത്യേക സമിതിക്ക് രൂപം നൽകി. കെപിസിസി അധ്യക്ഷൻ ഡി.കെ ശിവകുമാറാണ് പാർട്ടി നേതാക്കളുടെ ഒരു സമിതി രൂപീകരിച്ചത്. വിദ്യാഭ്യാസമന്ത്രി സുധാകർ, എംഎൽഎമാർ, എംഎൽസി മാർ, യൂത്ത് കോൺഗ്രസിൻ്റെയും നാഷണൽ സ്റ്റുഡന്റ് യൂണിയൻ ഓഫ് ഇന്ത്യയുടെയും സംസ്ഥാന പ്രസിഡൻ്റുമാർ എന്നിവരടങ്ങുന്ന ഒമ്പതംഗ സമിതിയേയാണ് നിയമിച്ചത്.
മെഡിക്കൽ വിദ്യാഭ്യാസ മന്ത്രി ശരൺ പ്രകാശ് പാട്ടീൽ ആണ് സമിതിയുടെ കൺവീനര്‍. 15 ദിവസത്തിനകം സമിതിയോട് റിപ്പോർട്ട് സമർപ്പിക്കാൻ പിസിസി അധ്യക്ഷനും ഉപമുഖ്യമന്ത്രിയുമായ ഡി.കെ.ശിവകുമാർ നിർദേശിച്ചു.
കാമ്പസുകളിൽ തിരഞ്ഞെടുപ്പു പുനഃസ്ഥാപിക്കുന്നതു സംബന്ധിച്ച് ആലോചിക്കാൻ ആവശ്യപ്പെട്ട് ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി മുഖ്യമന്ത്രി സിദ്ധ രാമയ്യയ്ക്ക് കത്തെഴുതിയിരുന്നു. ഈ പശ്ചാത്തലത്തിലാണ് അഭിപ്രായങ്ങൾ സ്വരൂപിച്ച് റിപ്പോർട്ട് നൽകാൻ സമിതി രൂപീകരിച്ചത്. വിദ്യാർഥി യൂണിയൻ തെരഞ്ഞെടുപ്പ് വീണ്ടും നടത്താനുള്ള പദ്ധതികളെക്കുറിച്ച് അടുത്തിടെ നടന്ന ഭരണഘടനാദിന പരിപാടിയിൽ ഉപമുഖ്യമന്ത്രി കൂടിയായ ശിവകുമാർ സംസാരിച്ചിരുന്നു. സംസ്ഥാനത്ത് വിദ്യാർഥി രാഷ്ട്രീയത്തിന് 1989 മുതൽ നിരോധനമുണ്ട്. അക്രമസംഭവങ്ങളെ തുടർന്നാണ് നിരോധനം ഏര്‍പ്പെടുത്തിയത്.
SUMMARY: Karnataka Congress appoints special committee to look into campus politics
