ബെംഗളൂരു: ബെംഗളൂരു വികസന അതോറിറ്റി (ബിഡിഎ)യുടെ നേതൃത്വത്തിൽ പരിസ്ഥിതി ദിനത്തോടനുബന്ധിച്ച് ബെംഗളൂരുവിൽ 15 ലക്ഷം മരങ്ങൾ ഒറ്റദിവസംകൊണ്ട് നട്ടുപിടിപ്പിക്കുന്ന ബ്രഹത് പദ്ധതി ‘ഗ്രീൻ ബെംഗളൂരു’വിൽ നിരവധി സന്നദ്ധ സംഘടനകള്‍ക്കൊപ്പം ‘എയ്മ’ കർണാടകയും പങ്കാളിയായി. വിദ്യാരണ്യപുരയില്‍ നടന്ന നടീല്‍ പ്രവര്‍ത്തനങ്ങളില്‍ എയ്മ അംഗങ്ങള്‍ പങ്കെടുത്തു. പ്രോഗ്രാം കോര്‍ഡിനേറ്റർ നീനു പങ്കജ്, അജിത കൃഷ്ണകുമാർ, നിധിൻ നായർ, അമിത് സി പിള്ള, സോജു സാം, അഭിലാഷ് ജേക്കബ്, ശ്രീജി കൃഷ്ണൻ എന്നിവര്‍ നേതൃത്വം നല്‍കി.
നഗരത്തിലെ വിവിധ ഇടങ്ങളില്‍ ഇന്ന് നടന്ന വനവൽക്കരണ യജ്ഞത്തില്‍ റസിഡന്റ് ഗ്രൂപ്പുകൾ, പ്രൊഫഷണലുകൾ, പൗര പ്രവർത്തകർ, സന്നദ്ധപ്രവർത്തകർ എന്നിങ്ങനെ നിരവധി ആളുകള്‍ ഭാഗമായി. നാദപ്രഭു കെമ്പെഗൗഡ ജയന്തിയോട് അനുബന്ധിച്ചുള്ള, ആദരവായും ഹരിതവൽക്കരണ ദൗത്യമായുമാണ് പരിപാടി സംഘടിപ്പിച്ചത്. 12 മണിക്കൂറിനുള്ളിൽ 243–245 ഏക്കർ സ്ഥലത്ത് 15 ലക്ഷം തൈകൾ നട്ടുപിടിപ്പിച്ച് ഗിന്നസ് വേൾഡ് റെക്കോർഡ് നേടാനും ബിഡിഎ ലക്ഷ്യമിടുന്നു. ഇതിലൂടെ സാമൂഹിക പിന്തുണയോടെയുള്ള ഹരിതവത്കരണം കൂടുതല്‍ ഇടങ്ങളിലേക്ക് വ്യാപിപ്പിക്കാമെന്നാണ് പ്രതീക്ഷിക്കുന്നത്.
SUMMARY: ‘AIMA’ joins hands with BDA’s Green Bengaluru
