ബെംഗളൂരു: നഗരത്തിൽ പുതുക്കിയ ഓട്ടോ നിരക്ക് നിശ്ചയിച്ചത് അശാസ്ത്രീയമെന്ന വിമർശനവുമായി ഓട്ടോ ഡ്രൈവർമാരുടെ സംഘടന. ഓഗസ്റ്റ് 1 മുതൽ അടിസ്ഥാന നിരക്കായി ആദ്യ 2 കിലോമീറ്ററിനു 36 രൂപയിൽ നിന്നു 38 രൂപയാക്കി വർധിപ്പിക്കാൻ ഗതാഗത വകുപ്പ് തീരുമാനിച്ചിരുന്നു. എന്നാൽ ഇതു 40 ആയി ഉയർത്തണമെന്നാണ് തൊഴിലാളികൾ ആവശ്യപ്പെടുന്നത്.
ഒപ്പം അധികമുള്ള ഓരോ കിലോമീറ്ററിനും 15 രൂപയെന്നത് 18 രൂപയായാണ് ഗതാഗത വകുപ്പ് വർധിപ്പിച്ചത്. ഇതു 20 രൂപയാക്കണമെന്നാണ് തൊഴിലാളി സംഘടനകൾ ആവശ്യപ്പെടുന്നു. തങ്ങളുടെ വാദങ്ങൾ കേൾക്കാതെ ഏകപക്ഷീയമായാണ് ഡപ്യൂട്ടി കമ്മിഷണർ ജി. ജഗദീഷ തീരുമാനം എടുത്തതെന്ന് ഓട്ടോറിക്ഷ ഡ്രൈവേഴ്സ് യൂണിയൻ (എആർഡിയു) ജനറൽ സെക്രട്ടറി ടി.എം. രാമമൂർത്തി ആരോപിച്ചു.
5 വർഷത്തിനിടയ്ക്കുള്ള നിരക്ക് വർധന ഒഴിവാക്കി എല്ലാ വർഷവും ഇതു പരിഷ്കരിക്കണമെന്നും രാമമൂർത്തി ആവശ്യപ്പെട്ടു.
SUMMARY: Auto unions slam ‘unscientific’ fare hike, seek ₹40 base fare.
