ചെന്നൈ: തമിഴ്നാട് നിയമസഭാ തിരഞ്ഞെടുപ്പ് ഫലം പുറത്തുവരാനിരിക്കെ, രാഷ്ട്രീയ കേന്ദ്രങ്ങളില് പുതിയ സഖ്യസാധ്യതകള് ചർച്ചയാകുന്നു. സൂപ്പർതാരം വിജയ്യുടെ തമിഴക വെട്രി കഴകത്തെ (ടിവികെ) എൻഡിഎ സഖ്യത്തിലേക്ക് സ്വാഗതം ചെയ്തുകൊണ്ട് ബിജെപി രംഗത്തെത്തിയതാണ് പുതിയ രാഷ്ട്രീയ നീക്കം. എഐഎഡിഎംകെ നേതൃത്വത്തിലുള്ള സഖ്യം അധികാരത്തിലേക്ക് അടുക്കുകയാണെങ്കില് വിജയിയെ എൻഡിഎയുടെ ഭാഗമാക്കാൻ പാർട്ടിയുടെ വാതിലുകള് എപ്പോഴും തുറന്നിരിക്കുമെന്ന് ബിജെപി സംസ്ഥാന വൈസ് പ്രസിഡന്റ് ഖുശ്ബു സുന്ദർ വ്യക്തമാക്കി.
വിജയിയെ തന്റെ അനിയനെന്ന് (തമ്പി) അഭിസംബോധന ചെയ്ത ഖുശ്ബു, ഒരു സഹോദരി എന്ന നിലയില് അദ്ദേഹത്തോട് സ്നേഹമുണ്ടെങ്കിലും രാഷ്ട്രീയ കൂറ് ബിജെപിയോടാണെന്ന് ഒരു അഭിമുഖത്തില് പറഞ്ഞു. വിജയ്ക്കെതിരെ തങ്ങള് ഇതുവരെ സംസാരിച്ചിട്ടില്ലെന്നും എൻഡിഎയുമായി സഹകരിക്കണമോ എന്ന കാര്യത്തില് അദ്ദേഹം സ്വന്തം പാർട്ടിയുമായി കൂടിയാലോചിച്ച് തീരുമാനമെടുക്കണമെന്നും അവർ കൂട്ടിച്ചേർത്തു.
അതേസമയം, സിനിമയിലെ താരമൂല്യം എല്ലായ്പ്പോഴും വോട്ടുകളായി മാറണമെന്നില്ലെന്ന ജാഗ്രതയും ഖുശ്ബു പങ്കുവെച്ചു. ഭരണകക്ഷിയായ ഡിഎംകെയെ രൂക്ഷമായ ഭാഷയില് വിമർശിച്ച ഖുശ്ബു, പാർട്ടിക്കുള്ളിലെ കുടുംബാധിപത്യത്തെ ചോദ്യം ചെയ്തു. മുതിർന്ന നേതാവ് കനിമൊഴിയെ മുഖ്യമന്ത്രി സ്ഥാനാർത്ഥിയായി ഉയർത്തിക്കാട്ടാത്തത് ഡിഎംകെയുടെ പുരുഷാധിപത്യ മനോഭാവമാണ് കാണിക്കുന്നതെന്ന് അവർ ആരോപിച്ചു.
SUMMARY: BJP has opened doors for victory: Khushbu Sundar
