തിരുവനന്തപുരം: പുതുവത്സരാഘോഷങ്ങളുടെ ഭാഗമായി സംസ്ഥാനത്ത് ബാറുകളുടെ പ്രവർത്തന സമയം നീട്ടി സർക്കാർ. ഡിസംബർ 31 ബുധനാഴ്ച ബാറുകള്ക്ക് രാത്രി 12 മണിവരെ പ്രവർത്തിക്കാനാണ് അനുമതി നല്കിയിരിക്കുന്നത്. ബിയർ ആൻഡ് വൈൻ പാർലറുകളുടെയും സമയം അന്നേ ദിവസം അർദ്ധരാത്രി വരെയായി നീട്ടിയിട്ടുണ്ട്.
സാധാരണയായി രാത്രി 10 മണിയോടെയാണ് ബാറുകളുടെ പ്രവർത്തനം അവസാനിപ്പിക്കാറുള്ളത്. പുതുവർഷവേളയിലെ വിനോദസഞ്ചാരികളുടെ വരവ് കണക്കിലെടുത്താണ് ഇളവ് അനുവദിച്ചത്. എന്നാല്, അതത് പ്രദേശങ്ങളിലെ ക്രമസമാധാന സാഹചര്യം പരിഗണിച്ചായിരിക്കും പ്രവർത്തനാനുമതി നല്കുക.
അതേസമയം, ഈ ഇളവ് ബീവറേജസ് കോർപ്പറേഷന്റെ ഔട്ട്ലെറ്റുകള്ക്ക് നിലവില് ബാധകമല്ലെന്ന് സർക്കാർ വ്യക്തമാക്കി. സുരക്ഷയും പൊതുശാന്തിയും മുൻനിർത്തിയാണ് നിയന്ത്രണങ്ങള് ഏർപ്പെടുത്തിയിരിക്കുന്നതെന്നും അധികൃതർ അറിയിച്ചു.
പുതുവത്സരാഘോഷങ്ങള് സുരക്ഷിതമായി നടക്കുന്നതിന് പോലീസ് ഉള്പ്പെടെയുള്ള വിവിധ വകുപ്പുകള് ജാഗ്രതാ നടപടികള് ശക്തമാക്കിയിട്ടുണ്ട്. ആഘോഷങ്ങളുടെ മറവില് നിയമലംഘനങ്ങള് ഉണ്ടാകാതിരിക്കാൻ കർശന നിരീക്ഷണവും പരിശോധനകളും നടത്തുമെന്നും അധികൃതർ അറിയിച്ചു.
SUMMARY: New Year’s Eve: Government orders extension of operating hours of bars in the state
