ചെന്നൈ: കനത്ത മഴ തുടരുന്ന നീലഗിരിയിലെ പർലിയാർ ഭാഗത്ത് മണ്ണിടിച്ചിലിൽപെട്ട് തമിഴ്നാട് സർക്കാർ ബസ്ഡ്രൈവർ മരിച്ചു. ഊട്ടി ബെട്ടട്ടി കനകരാജ് (50) ആണ് മരിച്ചത്. കൂനൂർ റോഡിൽ 14 സ്ഥലങ്ങളിലും കോത്തഗിരി റോഡിൽ മൂന്നു സ്ഥലത്തും മണ്ണിടിച്ചിൽ ഉണ്ടായിരുന്നു. കേരളത്തിൽ പാലാ ഉൾപ്പെടെയുള്ള സ്ഥലങ്ങളിൽനിന്നെത്തിയ വിദ്യാർഥികൾ അടങ്ങുന്ന സഞ്ചാരികളുടെ വാഹനങ്ങൾ രാത്രി മണിക്കൂറുകൾ കുടുങ്ങിയെങ്കിലും പുലർച്ചയോടെ സുരക്ഷിതമായി മേട്ടുപ്പാളയത്തിൽനിന്നു പുറപ്പെട്ടു
ഇന്നലെ രാത്രി മുതൽ രാവിലെ വരെ നീലഗിരി ജില്ലയിലും താഴ്‌വാര പ്രദേശമായ മേട്ടുപ്പാളയത്തും കനത്ത മഴയായിരുന്നു. നീലഗിരി ജില്ലയിലേക്കുള്ള രണ്ടു പ്രവേശന കവാടങ്ങളും മാർഗങ്ങളും സുരക്ഷ മുൻനിർത്തി പോലീസ് അടച്ചിട്ടിരിക്കുകയാണ്.
ഒക്ടോബർ 26 വരെ വിനോദസഞ്ചാരികൾ നീലഗിരിയിലേക്ക് പോകുന്നത് ഒഴിവാക്കണമെന്ന് ജില്ല കലക്ടർ നിർദേശിച്ചു. ഊട്ടി-മേട്ടുപ്പാളയം മലയോര ട്രെയിൻ സർവിസ് രണ്ടു ദിവസത്തേക്ക് റദ്ദാക്കി. മൂന്നു ദിവസത്തേക്ക് അടിയന്തര വാഹനങ്ങൾ ഒഴികെ സർക്കാർ ബസുകൾ ഉൾപ്പെടെ വാഹനഗതാഗതം വൈകീട്ട് ആറു മുതൽ രാവിലെ ഏഴുവരെ നിരോധിച്ചു.
SUMMARY: Heavy rain and landslides; travel to Ooty prohibited
