കൽപ്പറ്റ: കനത്ത മഴയെ തുടർന്ന് വയനാട് ജില്ലയിലെ വിദ്യാഭ്യാസ സ്ഥാപനങ്ങൾക്ക് വ്യാഴാഴ്ച അവധി പ്രഖ്യാപിച്ചു. കേന്ദ്ര കാലാവസ്ഥാ വകുപ്പ് ജില്ലയിൽ ഓറഞ്ച് അലർട്ട് പ്രഖ്യാപിച്ച സാഹചര്യത്തിലാണ് അവധി പ്രഖ്യാപിച്ചതെന്ന് ജില്ല കളക്ടര് ഡി ആര് മേഘശ്രീ അറിയിച്ചു. ജില്ലയിലെ അങ്കണവാടികള്, മത പഠന ക്ലാസുകള്, ട്യൂഷന് സെന്ററുകള്, സ്പെഷ്യല് ക്ലാസുകള്, പ്രൊഫഷണല് കോളേജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും നാളെ (30-7-2026) അവധി പ്രഖ്യാപിച്ചു. റസിഡന്ഷല് സ്കൂളുകൾക്കും, റസിഡന്ഷല് കോളേജുകള്ക്കും അവധി ബാധകമല്ലെന്ന് കലക്ടര് അറിയിച്ചു.
സംസ്ഥാനത്ത് മഴ കനക്കുകയാണ്. നാല് ദിവസം അതിശക്തമായ മഴയ്ക്ക് സാധ്യതയുണ്ട്. ഇന്ന് മൂന്നു ജില്ലകളില് ഓറഞ്ച് അലര്ട്ടും എട്ടു ജില്ലകളില് യെലോ അലര്ട്ടും പ്രഖ്യാപിച്ചു. ഇടുക്കി, വയനാട് , കണ്ണൂര് ജില്ലകളിലാണ് ഓറഞ്ച് അലര്ട്ട്. ഈ ജില്ലകളില് ശക്തമായ മഴക്കും ഒറ്റപ്പെട്ട അതിശക്തമായ മഴക്കും സാധ്യതയുണ്ട്.
SUMMARY: Heavy rain: Holiday for educational institutions in Wayanad district tomorrow
