പത്തനംതിട്ട: പത്തനംതിട്ട ജില്ലയിൽ കനത്ത മഴ തുടരുന്ന സാഹചര്യത്തിലും പമ്പയിൽ ജലനിരപ്പ് ഉയരുന്ന പശ്ചാത്തലത്തിലും ശബരിമല തീർത്ഥാടകർക്ക് മുന്നറിയിപ്പ് നൽകി തിരുവിതാംകൂർ ദേവസ്വം ബോർഡ്. അതിതീവ്ര മഴ തുടരുന്നതിനാല് ഞായര്, തിങ്കള് ദിവസങ്ങളില് ശബരിമല ദര്ശനം ഒഴിവാക്കാന് ശ്രമിക്കണമെന്നാണ് ഭക്തര്ക്ക് തിരുവിതാംകൂര് ദേവസ്വം ബോര്ഡിന്റെ നിര്ദേശം. പമ്പയില് പ്രളയമുന്നറിയിപ്പ് നിലനില്ക്കുന്നു. കനത്ത മഴ, വെള്ളപ്പൊക്കം, മണ്ണിടിച്ചില് സാധ്യത എന്നിവ മുന്നില് കണ്ടാണ് സുരക്ഷാ മുന്നറിയിപ്പ് നല്കിയിട്ടുള്ളത്.
നിറപുത്തരി ചടങ്ങുകള്ക്ക് ശബരിമല നട തുറക്കുന്ന ഓഗസ്റ്റ് 2, 3 തീയതികളില് ദര്ശനം നടത്താന് തീരുമാനിച്ചിട്ടുള്ള ഭക്തര് കഴിവതും യാത്ര ഒഴിവാക്കണം. ഓഗസ്റ്റ് മാസത്തിൽ തന്നെ ചിങ്ങമാസ പൂജകൾക്കായും (ഓഗസ്റ്റ് 16 മുതൽ 21 വരെയും) ഓണത്തോട് അനുബന്ധിച്ച പൂജകൾക്കായും (ഓഗസ്റ്റ് 24 മുതൽ 28 വരെയും) ശബരിമല നട തുറക്കുന്നുണ്ടെന്നും ഈ സമയം ദർശനത്തിനായി ഭക്തർക്ക് തെരെഞ്ഞെടുക്കാവുന്നതാണെന്നും ബോർഡ് ചൂണ്ടിക്കാട്ടി. അതിതീവ്ര മഴ തുടരുന്നതിനാലും മണ്ണിടിച്ചിൽ സാധ്യതയുള്ളതിനാലുമാണ് ഭക്തരോട് ഇത്തരത്തിൽ ഒരു അഭ്യർത്ഥന നടത്തുന്നതെന്നും തിരുവിതാംകൂർ ദേവസ്വം ബോർഡ് വിശദീകരിച്ചു.
അതേസമയം സംസ്ഥാനത്താകെ അതിതീവ്ര മഴ തുടരുകയാണ്. 9 ജില്ലകളിൽ റെഡ് അലർട്ടും 5 ജില്ലകളിൽ ഓറഞ്ച് അലർട്ടും പ്രഖ്യാപിച്ചിട്ടുണ്ട്. പത്തനംതിട്ട, കോട്ടയം, ഇടുക്കി, തൃശൂർ, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് റെഡ് അലർട്ട്. തിരുവനന്തപുരം, കൊല്ലം, ആലപ്പുഴ, എറണാകുളം, പാലക്കാട് ജില്ലകളിലാണ് ഓറഞ്ച് അലർട്ട്.
കനത്ത മഴയെത്തുടര്ന്ന് പത്തനംതിട്ട റാന്നിയില് അതീവ ഗുരുതരാവസ്ഥയാണ്. പമ്പയാര് കരകവിഞ്ഞൊഴുകിയതിനെ തുടര്ന്ന് റാന്നിയിലെ ജനവാസ മേഖലകളും ടൗണും പൂര്ണ്ണമായും വെള്ളത്തിനടിയിലായി. ഇപ്പോഴും ശക്തമായ മഴ തുടരുന്നത് മേഖലയെ ആശങ്കപ്പെട്ടുത്തുകയാണ്.
സംസ്ഥാനത്ത് മഴക്കെടുതിയില് ഇതുവരെ എട്ട് മരണമാണ് റിപ്പോര്ട്ട് ചെയ്തിരിക്കുന്നത്. കനത്തമഴയെത്തുടര്ന്ന് കോട്ടയം ജില്ലയില് 10 ദുരിതാശ്വാസക്യാമ്പുകള് തുറന്നു.
SUMMARY: Heavy rains; Devotees should avoid Sabarimala pilgrimage if possible; Travancore Devaswom Board requests
