ബെംഗളൂരു: കേരളസമാജം ബെംഗളൂരു സൗത്ത് വെസ്റ്റിൻ്റെ ഓണാഘോഷപരിപാടിയായ “പൊന്നോണം 2026” നവംബർ 7, 8 തിയതികളിൽ നടക്കും. 7നു വൈകീട്ട് കെങ്കേരി ദുബാാസിപാളയ ഡി.എസ്.എ ഭവനിൽ 3.30 നു നടക്കുന്ന സാഹിത്യ സായാഹ്നത്തിൽ കവിയും ഗാനരചയിതാവും നാടകകൃത്തും പ്രഭാഷകനുമായ കരിവെള്ളൂർ മുരളി ‘കല, സാഹിത്യം, ജീവിതം – കേരളീയ സമൂഹത്തിൻ്റെ ഭാവഭേദങ്ങൾ’ എന്ന വിഷയത്തിൽ മുഖ്യ പ്രഭാഷണം നടത്തും. ബെംഗളൂരുവിലെ എഴുത്തുകാരും സാംസ്കാരിക പ്രവർത്തകരും ചർച്ചയിൽ പങ്കു ചേരും. നൃത്തമൽസരം, ഉപകരണസംഗീതമൽസരം, ശ്രുതിലയം ഓർക്കസ്ത്ര അവതരിപ്പിക്കുന്ന കരോക്കെ ഗാനമേള എന്നിവ ഉണ്ടാകും.
ഓണാഘോഷത്തോടനുബന്ധിച്ച് നടത്തിയ കലാകായിക മൽസരങ്ങളിലെ വിജയികൾക്കുള്ള സമ്മാനദാനം, എസ്.എസ്.എൽ.സി, പി.യു.സി. പരീക്ഷകളിൽ ഉന്നതവിജയം നേടിയവർക്കുള്ള എൻഡോവ്മെൻ്റ് ക്യാഷ് അവാർഡ് വിതരണം എന്നിവ നടക്കും.
8 ന് രാവിലെ 9 മണിക്ക് ഡി.എസ്.എ ഭവനിൽ ചേരുന്ന സാംസ്കാരിക സമ്മേളനം വിജയനഗർ എം.എൽ.എ. കൃഷ്ണപ്പ ഉദ്ഘാടനം ചെയ്യും. ഗോവിന്ദരാജനഗർ എം.എൽ.എ. പ്രിയ കൃഷ്ണ, യശ്വന്തപുര എം.എൽ.എ. എസ്.ടി. സോമശേഖർ, കരിവെള്ളൂർ മുരളി എന്നിവർ അതിഥികളാകും. സമാജം കുടുംബാംഗങ്ങൾ അവതരിപ്പിക്കുന്ന കലാവിരുന്ന്, ചെണ്ടമേളം, ഓണസദ്യ എന്നിവയ്ക്കു ശേഷം കോഴിക്കോട് റെഡ് ഐഡിയാസ് അവതരിപ്പിക്കുന്ന മെഗാ ഷോയിൽ ഏഷ്യാനെറ്റ് സ്റ്റാർ സിംഗർ താരങ്ങളായ വിധുരാജ്, ദിലീപ്, മയിലാഞ്ചി രാവ് ഫെയിം മോനിഷ, ഫരീദ് എന്നിവർ പങ്കെടുക്കുന്ന ലൈവ് മ്യൂസിക് ഷോ, കിഷോർ അന്തിക്കാട് അവതരിപ്പിക്കുന്ന സാക്സോഫോൺ ഫ്യൂഷൻ എന്നിവ അരങ്ങേറും.
SUMMARY: Kerala Samajam Bengaluru South West Onam celebrations on November 7 and 8
