തിരുവനന്തപുരം: കിഫ്ബി വഴി കണ്ണൂർ ജില്ലയിൽ കോടിക്കണക്കിന് രൂപ ചെലവഴിച്ച് ഭൂമി ഏറ്റെടുത്ത നടപടികളിൽ വീഴ്ച സംഭവിച്ചെന്ന ആരോപണത്തിൽ സര്‍ക്കാര്‍ അന്വേഷണത്തിന് ഉത്തരവിട്ടു. പ്രതിപക്ഷ എതിർപ്പിനെ അവഗണിച്ചാണ് സർക്കാർ നീക്കം. ഇതുസംബന്ധിച്ച മന്ത്രിസഭ ശിപാർശ വിജിലന്‍സ് ഡയറക്ടർക്ക് കൈമാറും. വിജിലൻസ് ഡയറക്ടർ മനോജ് എബ്രഹാം അന്വേഷണ സംഘത്തിന്‍റെ കാര്യത്തിൽ തീരുമാനമെടുക്കും.
സുധാ പിള്ള സമിതി റിപ്പോര്‍ട്ട് അടിസ്ഥാനമാക്കിയാണ് അന്വേഷണം. ഭൂമി ഏറ്റെടുത്തതും അനധികൃത നിയമനവും അന്വേഷിക്കും. പദ്ധതികളുടെ പേര് വ്യക്തമാക്കാതെ കണ്ണൂര്‍ ജില്ലയില്‍ ആദ്യം ആയിരം ഏക്കര്‍ ഭൂമി ഏറ്റെടുക്കാനുള്ള നിര്‍ദേശത്തിന്റെ മറവില്‍ പിന്നീട് 4200 ഏക്കര്‍ കൂടി ഏറ്റെടുക്കാന്‍ തീരുമാനിച്ചതുൾപ്പെടെ കാര്യങ്ങളെക്കുറിച്ചാണ് അന്വേഷണം. സമിതി റിപ്പോർട്ടിന്റെ അടിസ്ഥാനത്തിൽ വിശദമായ പ്രാഥമിക റിപ്പോർട്ട് തയ്യാറാക്കും. ഇതിന്റെ അടിസ്ഥാനത്തിലാകും വരുംദിവസങ്ങളിൽ അന്വേഷണ നടപടികൾ കൂടുതൽ ശക്തമാക്കുക.
ധനകാര്യ, റവന്യൂ വകുപ്പുകളുടെ സാങ്കേതിക സഹായത്തോടെ വിശദ അന്വേഷണം നടത്താന്‍ സംസ്ഥാന വിജിലന്‍സിനെ ചുമതലപ്പെടുത്താനാണ് മന്ത്രിസഭ തീരുമാനിച്ചത്. കിഫ്ബിയുമായി ബന്ധപ്പെട്ട് സർക്കാർ നിയോഗിച്ച മുൻ ചീഫ് സെക്രട്ടറി സുധാപിള്ളയുടെ നേതൃത്വത്തിലുള്ള വിദഗ്ധ കമ്മിറ്റിയുടെ റിപ്പോർട്ടിൽ ഗുരുതരമായ പല കണ്ടെത്തലുകളുമുണ്ടായിരുന്നു.
SUMMARY: Irregularities in KIIFB, land acquisition: State government announces Vigilance probe
