ജെറുസലേം: ഇസ്രായേൽ പാർലമെന്‍റ് തിരഞ്ഞെടുപ്പിൽ വോട്ടെണ്ണൽ 90 ശതമാനം പിന്നിടുമ്പോഴും ആർക്കും വ്യക്തമായ ഭൂരിപക്ഷമില്ല. ഇതോടെ സർക്കാർ രൂപവത്കരണം അനിശ്ചിതത്വത്തിലായി. 90.5 ശതമാനം വോട്ടെണ്ണൽ പൂർത്തിയാക്കിയപ്പോൾ പ്രധാനമന്ത്രി ബെഞ്ചമിൻ നെതന്യാഹുവിന്‍റെ പാർട്ടിയായ ലികുഡ് പാർട്ടി നയിക്കുന്ന ഭരണപക്ഷ സഖ്യം 53 സീറ്റുകളിൽ ലീഡ് ചെയ്യുന്നുണ്ട്. പ്രതിപക്ഷമായ മുൻ സൈനിക മേധാവി ഗാദി ഐസൻകോട്ടിന്റെ നേതൃത്വത്തിലുള്ള യാഷർ പാർട്ടി 48 സീറ്റുകളിലാണ് മുന്നേറുന്നത്.19 സീറ്റുകളിൽ ലീഡ് നേടി അറബ് പാർട്ടികൾ നിർണായക ശക്തിയായി മാറുകയും ചെയ്തു.
120 അംഗ പാർലമെന്റിൽ 61 സീറ്റാണ് ഭൂരിപക്ഷത്തിനു വേണ്ടത്. നിലവിലെ സാഹചര്യത്തിൽ ഒരു മുന്നണിക്കും ഭരിക്കാനുള്ള ഭൂരിപക്ഷമില്ല. ആർക്കും കേവല ഭൂരിപക്ഷമില്ലാത്തത് രാജ്യത്ത് പുതിയ രാഷ്ട്രീയ അനിശ്ചിതത്വം സൃഷ്ടിച്ചിട്ടുണ്ട്. ലിക്കുഡിന്റെയും യഷാറിന്റെയും നേതാക്കൾ തങ്ങളുടെ സഖ്യം വിപുലീകരിക്കാനുള്ള ശ്രമങ്ങൾ തുടങ്ങിയിട്ടുണ്ട്. നിലവിലെ സാഹചര്യത്തിൽ ജോയിന്‍റ് ലിസ്റ്റ് സഖ്യത്തിലെയും റാ ആം ഉൾപ്പെടെയുള്ള അറബ് പാർട്ടികളുടെ നിലപാടും ഇസ്രയേലിൽ നിർണായകമാവുകയാണ്.
1999നുശേഷമുള്ള ഏറ്റവും ഉയർന്ന പോളിങ്ങാണ് ഇത്തവണ ഇസ്രായേലിൽ രേഖപ്പെടുത്തിയത്. 77.7 ശതമാനം വോട്ടർമാർ സമ്മതിദാനാവകാശം വിനിയോഗിച്ചു. നവംബർ നാലിനാണ് ഔദ്യോഗിക ഫലം പുറത്തുവരിക.
SUMMARY: Political uncertainty in Israel; no one has the majority to form a government, 90% of votes counted.
