രാജസ്ഥാനില്‍ കെമിക്കല്‍ ഫാക്ടറിയില്‍ വൻ തീപിടുത്തം; ഏഴ് തൊഴിലാളികള്‍ വെന്തുമരിച്ചു

ജയ്പൂർ: രാജസ്ഥാനില്‍ ഭിവാഡിയിലെ കെമിക്കല്‍ ഫാക്ടറിയിലുണ്ടായ വൻ തീപിടിത്തത്തില്‍ ഏഴ് തൊഴിലാളികള്‍ മരിച്ചു. 10 തൊഴിലാളികള്‍ ഇപ്പോഴും ഫാക്ടറിയില്‍ കുടുങ്ങിക്കിടക്കുന്നുണ്ടെന്നാണ് വിവരം. ഇന്ന് രാവിലെ 9.30 ഓടെയായിരുന്നു അപകടം. തീപിടുത്തമുണ്ടായപ്പോള്‍ 20-25 തൊഴിലാളികള്‍ ഫാക്ടറിയില്‍ ജോലി ചെയ്യുന്നുണ്ടായിരുന്നു. അല്‍വാർ ജില്ലയിലെ ഖുഷ്ഖേര വ്യവസായ നഗരിയിലാണ് അപകടം.

പ്രദേശത്ത് പതിവ് പോലീസ് പട്രോളിംഗ് നടത്തുന്നതിനിടെയാണ് സംഭവം ആദ്യം ശ്രദ്ധയില്‍പ്പെട്ടതെന്ന് അഡീഷണല്‍ ജില്ലാ മജിസ്ട്രേറ്റ് സുമിത മിശ്ര പറഞ്ഞു. മാസങ്ങളായി അടഞ്ഞുകിടക്കുന്ന ഫാക്ടറിയാണിതെന്ന് അധികൃതർ പറഞ്ഞു. കെട്ടിടത്തില്‍ വലിയ അളവില്‍ കാർഡ് ബോർഡുകള്‍ സൂക്ഷിച്ചിരുന്നു. തിങ്കളാഴ്ച്ച രാവിലെ 10 മണിയോടെ കെട്ടിടത്തിനുള്ളില്‍ നിന്ന് പുക ഉയർന്നിരുന്നു.

പിന്നീട് നിമിഷങ്ങള്‍ക്കകം തീപിടിത്തമുണ്ടാവുകയും ഒന്നിലധികം സ്ഫോടനങ്ങള്‍ ഉണ്ടായതായും ദൃക്സാക്ഷികള്‍ പറഞ്ഞു. ഫാക്ടറിയില്‍ ഉണ്ടായിരുന്ന ഗ്യാസ് സിലിണ്ടറുകളാവാം സ്ഫോടനത്തിന് കാരണമായതെന്നാണ് പ്രാഥമിക നിഗമനം. യഥാർഥ കാരണം വ്യക്തമല്ല.

SUMMARY: Massive fire breaks out at chemical factory in Rajasthan; Seven workers burnt to death